Stýdentterdi óndiristik tájirıbege qabyldaıtyn kásiporyndardyń ulttyq reestrin jasaý qajet – Erlan Sydyqov
«Joǵary oqý oryndary el ekonomıkasynyń óndiristik salasymen baılanysyn damytý máselesin de talqylaǵan jón. Óndiristik tájirıbeni uıymdastyrý tásilderin túbegeıli sheshýimiz qajet. Bizdiń kásiporyndarmen qarym-qatynasymyzdy ıntegratsııalaýǵa múmkindik beretin bul shynaıy protsestiń, ókinishke qaraı, birqatar kemshilikteri bar. Stýdentterdi óndiristik tájirıbege qabyldaıtyn uıymdardyń, kásiporyndardyń, mekemelerdiń ulttyq reestrin jasaý qajet. Tájirıbe zamanaýı tehnologııalyq jelileri men zamanaýı tehnologııalyq ınnovatsııalary bar jerde ótkizilýi kerek. Óndiristik tájirıbe ótkizý quqyǵyn sertıfıkattaý qajet. Buǵan kásiporyndar da, ýnıversıtetter de múddeli», - dedi L. Gýmılev atyndaǵy EUÝ-nyń rektory Erlan Sydyqov respýblıkalyq rektorlar keńesiniń otyrysynda.
Onyń usynýynsha, óndiristik tájirıbe ýaqytyn kem degende 2 esege arttyrý kerek.
«Osy usynystardy QR Bilim jáne ǵylym mınıstrliginiń qaraýyna engizýdi usynamyn. Ózderińiz bilesizder jazda óndiristik tájirıbege stýdentterge jetekshilik etý úshin jas oqytýshylar jiberiledi. Óndiristik tájirıbege kafedranyń jetekshi pedagogtaryna, ǵylymı qyzmetkerlerge ǵana jetekshilik etýge ruqsat berýdi usynamyn. Joǵary oqý oryndarynyń tarapynan kásiporyndardy qoldaý turǵysynda iri joǵary oqý oryndarynyń bazasynda ınjener-tehnıkalyq qyzmetkerler men mamandardyń biliktiligin arttyrý ortalyqtarynyń respýblıkalyq júıesin qurý jáne damytý qajet», - deıdi ol.
