Stýdentterdi áskerden bosatý, olardyń boryshyn óteýge degen nıetin buzdy - depýtat

ASTANA. QazAqparat – Májilis depýtaty Erbolat Saýryqov jastardyń áskerı mindetin óteýi jolyndaǵy kedergiler men problemalardy atady, dep habarlaıdy QazAqparat tilshisi.

«Birinshiden, elimizde jastar saıasaty máselesi men ulttyq ıdeologııa aqsap tur. Ekinshiden, jastardyń boıynda Otanǵa degen súıispenshilik pen patrıottyq tárbıe joqtyń qasy. Úshinshiden, otbasy men mektep tárbıesi, qoǵamdyq orta men jumys ornyndaǵy tárbıe tómendep ketken. Tórtinshiden, kolledjder men JOO qabyrǵasynda kúndizgi oqý formasyndaǵy jastardy áskerden bosatý – jastarymyzdyń Otan aldyndaǵy boryshyn óteýge degen nıetin buzyp otyr», - dedi Erbolat Saýryqov Májiliste ótken is-sharany asha otyryp.

Depýtat kótergen besinshi problema jastarymyzdyń boıynda Otan aldyndaǵy boryshyn óteý kerektigin umytyp, sanasynda jeńil qarjy men tabys tabý sııaqty oılar basymdyqqa ıe bolyp alǵan.

«Altynshydan, dinı aǵymdaǵy qyzmetkerler múldem alynbaıdy, al ózge ult ókilderi kóbinese áskerge barýdan bas tartady. Jetinshiden, memlekettik qyzmet pen oǵan teńestirilgen azamattar, quqyq qorǵaý salasyna jumysqa turýshylar mindetti túrde áskerden keıin ǵana jumysqa alynýy mindet degen basty qaǵıda oryndalmaıdy. Segizinshiden, qazirgi áskerdegi keleńsiz oqıǵalar: kúsh kórsetý, qarjy talap etý, eriksiz jumysqa shegý, ádiletsizdik ornatý, adam ólimi men túrli sýıtsıdter jastardyń áskerge barmaýynyń basty sebebi bolyp otyr», - dep tarqatyp berdi halyq qalaýlysy.

Aıta keteıik, búgin Májilistiń halyqaralyq ister, qorǵanys jáne qaýipsizdik komıtetinde merzimdi áskerı qyzmet ótegen sarbazdarǵa bilim berý jáne ózge de jeńildikter tetigin iske asyrý máseleleri qaraldy.