Stýdentterden aqsha bopsalady degen kúdikpen 22 jastaǵy azamat ustaldy
QOSTANAI. KAZINFORM — Qostanaıda turǵyndardan iri kólemde aqsha bopsalaǵan kúdikti ustaldy. Bul týraly Qostanaı oblysy polıtsııa departamentiniń baspasóz qyzmeti habarlady.
Polıtsııa 2024 jyldyń jeltoqsanynan 2025 jyldyń aqpanyna deıin jasalǵan birneshe qylmystyq oqıǵany tergep jatyr.
Qostanaı oblysy PD-nyń uıymdasqan qylmysqa qarsy kúres basqarmasy Qostanaı qalasynyń 22 jastaǵy turǵynyn ustady. Ol eki stýdentten iri kólemde aqsha bopsalady degen kúdikke ilindi.
Quqyq qorǵaý organdarynyń málimetinshe, kúdikti jábirlenýshilerge psıhologııalyq qysym kórsetip, kúsh qoldanamyn dep qorqytqan. Sonyń saldarynan zardap shekkender oǵan 1 mıllıon teńgeden astam qarajat bergen.
Qazirgi tańda kúdiktige turǵylyqty jerden shyqpaý týraly qolhatpen bultartpaý sharasy qoldanyldy. Oǵan qatysty qylmystyq is qozǵaldy, sotqa deıingi tergeý amaldary júrgizilip jatyr.
Qylmystyq kodeksiniń 194-baby 2-bóligine sáıkes, oǵan jeti jylǵa deıin bas bostandyǵynan aıyrý jáne múlkin tárkileý jazasy qoldanylýy múmkin. Tergeý áreketteri jalǵasyp jatyr. Polıtsııa oqıǵanyń barlyq mán-jaıyn anyqtap, kúdiktiniń basqa da bopsalaý derekterine qatysy bar-joǵyn tekserip jatyr.
Aıta ketelik elimizde jyl basynan beri adam saýdasyna qatysty 285 qylmystyq is tirkelgen.