Stýdentterdi áskerge kósheden alyp ketý: mınıstr jańa sheshim usyndy

ASTANA. KAZINFORM — Ǵylym jáne joǵary bilim mınıstri Saıasat Nurbek stýdentterdi kósheden áskerge alyp ketý áreketine qatysty usynys aıtty. 

— Nazarbaev ýnıversıtetiniń stýdentin áskerge alyp ketti, bul jerde zań saqtalyp tur. Bizdiń joǵary oqý oryndaryna qabyldaý merzimi men Qorǵanys mınıstrliginiń áskerge shaqyrý merzimi sáıkes kelmeıdi. Naqty Nazarbaev ýnıversıtetine kelsek, oqý orny sheshimdi shilde, tamyzda qabyldaıdy, sondyqtan stýdent mártebesi bolmasa, áskerge alyp ketýi múmkin, — dep jaýap berdi Saıasat Nurbek Májilis qabyrǵasynda BAQ ókilderiniń saýalyna.

Osy oraıda mınıstr stýdentterdi áskerge shaqyrý máselesin Qorǵanys mınıstrligimen birlesip qarastyryp jatqanyn aıtty.

— Biz Qorǵanys mınıstrligine merzimdi sáıkestendirý boıynsha usynys jasadyq. Nazarbaev ýnıversıteti bizdiń kómegimizben stýdent mártebesin berý týraly sheshim qabyldady, buıryq shyqty. Endi bizge merzimdi sáıkestendirý kerek, sebebi talapkerler emtıhan, synaq nátıjesin kútedi, al osy sátte talapkerdi áskerge shaqyrýy múmkin. Sondyqtan kóktemgi jáne kúzgi áskerge shaqyrý merzimimen sáıkestendirip jatyrmyz, — dep túsindirdi vedomstvo basshysy.

Buǵan deıin áleýmettik jelilerde áskerge shaqyrtý jasyndaǵy azamattardy májbúrli túrde ustap, jergilikti áskerı basqarý organdaryna jetkizý týraly beınematerıaldarǵa baılanysty Qorǵanys mınıstrligi resmı túsinikteme bergen edi.