Stýdentter JI arqyly óndiris protsesin basqarýdy úırenedi

ASTANA. KAZINFORM — Astanadaǵy APEC PetroTechnic joǵary kolledjinde jasandy ıntellekt zerthanasy qurylmaq. 

Jobany júzege asyrý bastamasyn Qytaıdyń iri kompanııasy usynǵan.

Bul týraly APEC PetroTechnic joǵary kolledjiniń dırektory Asylbek Nurmyshev «Búgin LIVE» baǵdarlamasyna bergen suhbatynda aıtty.

— Aqtaýda alty memleket qatysqan TurkSkills stýdentter chempıonaty ótti. Sol kezde qytaılyq kompanııanyń bas dırektory Lı Hý myrza bizdiń kórmege qoıǵan jobalarymyzdy kórip, qyzyǵýshylyq tanytty. Chempıonat aıaqtalǵan soń APEC PetroTechnic joǵary kolledjine kelip, bizdiń materıaldyq-tehnıkalyq bazamen tanysty. Kolledjdiń basty ereksheligi — munaı-gaz salasyndaǵy mamandardy tek aǵylshyn tilinde daıarlaý. Lı Hý myrza oqytýshylar men stýdentterdiń aǵylshyn tilinde erkin sóıleıtinin kórip, tańǵaldy. Sol kezde halyqaralyq deńgeıdegi zerthana qurý týraly usynys bildirdi, — dedi stýdııa qonaǵy.

Kolledj dırektory elimizdegi jasandy ıntellekt salasyndaǵy alǵashqy zerthananyń mańyzyn da atap ótti.

— Qazaqstandaǵy tehnıkalyq jáne kásiptik bilim berý júıesinde mundaı zerthana osy ýaqytqa deıin bolmaǵan. Bul ortalyq stýdentterdiń biliktiligin jańa deńgeıge kóterýge múmkindik beredi. Munda ІT, avtomattandyrý jáne basqarý salasynda óndiristik protsesterdi jasandy ıntellekt arqyly basqarý úıretiledi. Sondaı-aq, TALAP kommertsııalyq emes bilim berý aktsıonerlik qoǵamymen birlesip, tehnıkalyq jáne kásiptik bilim berý salasyndaǵy oqytýshylardyń biliktiligin arttyrý da osy ortalyqta júzege aspaq. Bul ustazdar úshin de úlken múmkindik, — dedi Asylbek Nurmyshev.