Stýdentter JI negizinde bilim berý jobalaryn ázirledi
ASTANA. KAZINFORM – Joba jasandy ıntellekt kómegimen pánaralyq baılanysty kúsheıtýge, ınteraktıvti bilim berý kontentin qalyptastyrýǵa jáne oqý nátıjelerin baǵalaý úderisin jetildirýge baǵyttalǵan.
Abaı ýnıversıtetinde «AI-Sana» baǵdarlamasy aıasynda stýdentterdiń jasandy ıntellekt salasyndaǵy quzyretterin damytý jumystary júıeli túrde júzege asyrylyp keledi. Baǵdarlama bilim alýshylardyń zamanaýı tehnologııalardy meńgerýine, jasandy ıntellekt quraldaryn bilim berý úderisinde tıimdi qoldanýyna jáne ınnovatsııalyq jobalar ázirleýine baǵyttalǵan.
«AI-Sana» bilim berý kýrsyna qatysýǵa ýnıversıtettiń 2173 bilim alýshysy ótinim bergen. Іrikteý nátıjesinde jobaǵa 979 stýdent qatysyp, qazirgi tańda olardyń 240-y qarqyndy oqytý kezeńin tolyq aıaqtady.
Teorııalyq bilimin praktıkamen ushtastyrǵan stýdentter jasandy ıntellekt negizinde ázirlegen alǵashqy tsıfrlyq jobalaryn sátti qorǵady. Olardyń biri — Matematıka, fızıka jáne ınformatıka fakýltetiniń stýdenti Nuraı Maılybaı. Ol oqý úderisine jasandy ıntellekt múmkindikterin engizýge baǵyttalǵan «Zerde AI» platformasyn usyndy. Joba oqýshylardyń qatelerin qysqa ýaqytta anyqtap, olardyń bilim deńgeıine sáıkes jeke tapsyrmalar ázirleý múmkindigimen erekshelenedi.
— Bul baǵdarlama arqyly biz, eń aldymen, ýaqytty tıimdi paıdalanýdy úırendik. Men ázirlegen ádisteme ár oqýshynyń qateligin birneshe sekýnd ishinde anyqtap, bilimin jetildirýge arnalǵan jeke tapsyrmalar usynady. Mundaı tásil muǵalimderdiń kúndelikti jumysyn jeńildetýge múmkindik beredi, — deıdi Nuraı Maılybaı.
Baǵdarlamaǵa qatysýshy Jaıdary Nyǵmethanova «SmartSana» jobasyn ázirledi. Joba jasandy ıntellekt kómegimen pánaralyq baılanysty kúsheıtýge, ınteraktıvti bilim berý kontentin qalyptastyrýǵa jáne oqý nátıjelerin baǵalaý úderisin jetildirýge baǵyttalǵan. Sonymen qatar joba aıasynda kórneki materıaldardy jedel ázirleý jáne muǵalim men oqýshy arasyndaǵy keri baılanysty jaqsartý tetikteri usynyldy.
— «AI-Sana» kýrsy bizge úlken shyǵarmashylyq múmkindik berdi. Zamanaýı quraldardy paıdalana otyryp, muǵalim men oqýshy arasyndaǵy ózara baılanysty jańa deńgeıge kóterýge baǵyttalǵan sheshim ázirledim. Baǵdarlama bilim alýshylardyń nátıjelerin taldaýǵa jáne olardyń damý dınamıkasyn baqylaýǵa múmkindik beredi, — dep atap ótti Jaıdary Nyǵmethanova.
Abaı ýnıversıteti bilim alýshylardyń tsıfrlyq quzyretterin damytýǵa jáne olardy jańa tehnologııalardy tıimdi qoldana alatyn mamandar retinde qalyptastyrýǵa erekshe mán beredi. Qazirgi kezeńde pedagog tek kásibı bilimmen shektelmeı, jasandy ıntellekt quraldaryn oqý úderisine kiriktire bilýi mańyzdy. «AI-Sana» baǵdarlamasy stýdentterdiń tehnologııalyq saýattylyǵyn arttyryp, ınnovatsııalyq oılaý qabiletin damytýǵa jáne bilim berý salasyna jańa tásilder engizýge múmkindik berip otyr.
Aıta ketelik Qazaqstanda kolledjderge qujat qabyldaý jalǵasyp jatyr.
