Stýdentter JI-di paıdalanýdan ony jasaýǵa kóshti - mınıstr
ASTANA. KAZINFORM – Qazaqstan stýdentteri túrli saladaǵy mindetterdi sheshýge arnalǵan ózderiniń jasandy ıntellekt agentterin ázirlep jatyr. Bul týraly Ǵylym jáne joǵary bilim mınıstri Saıasat Nurbek AI-Sana baǵdarlamasyn iske asyrýǵa arnalǵan is-shara barysynda aıtty.
Mınıstrdiń atap ótýinshe, baǵdarlamanyń ekinshi kezeńinde stýdentter jasandy ıntellekt negizderin meńgerýden naqty sheshimder ázirleýge kóshti.
- Bıyl baǵdarlamanyń ekinshi kezeńi bastaldy. Onyń aıasynda stýdentterimiz jasandy ıntellekt agentteri dep atalatyn júıelerdi tereńirek ázirleýge úırenip jatyr. Búgin sol agentterdiń birqatar úlgisi tanystyryldy. Olar aýyl sharýashylyǵynan bastap bilim berý, densaýlyq saqtaý jáne ónerkásip salalaryna deıingi keń aýqymdy qamtıdy, – dedi Saıasat Nurbek.
Ol baǵdarlamanyń maqsaty adamdardy daıyn jasandy ıntellekt servısterin paıdalanýǵa ǵana úıretý emes ekenin atap ótti.
- Kópshilik jasandy ıntellektini kádimgi Google izdeý júıesi sııaqty nemese túrli suranys jiberý úshin paıdalanady. Al algorıtmderdiń qalaı jumys isteıtinin tereń túsiný, eń bastysy – naqty ári arnaıy mindetterdi sheshýge arnalǵan óz algorıtmderińdi úıretý – mine, naǵyz qosylǵan qun osy, – dedi mınıstr.
Buǵan deıin Prezıdent Jasandy ıntellektini damytý jónindegi keńestiń úshinshi otyrysy barysynda JI tehnologııasyn qaýipsiz ári jaýapkershilikpen damytýdy kózdeıtin «Vashıngton modelin» quptaıtynyn aıtqan edi.
