Stýdentter teatry «Mıllıon raýshan gúlin» sahnalaıdy
ALMATY. 13 sáýir. QazAqparat - Almatyda 14 sáýirde Ómirbek Joldasbekov atyndaǵy Stýdentter saraıynda «Mıllıon raýshan gúl» qoıylymy bolady.
Ony Ál-Farabı atyndaǵy Qazaq ulttyq ýnıversıtetiniń «Biz» stýdentter teatry sahnalamaq. Qurylǵanyna alty jyl bolǵan bul óner ujymy buǵan deıin kórermen nazaryna «Adaspańdar», «Toı», «Keshirińiz, sizdi ajal kútip tur!» «Baǵdarsham», «Ol kóktem oralmaıdy» sııaqty qoıylymdaryn usynǵan bolatyn.
2006 jyldyń sáýir aıynda óz shymyldyǵyn «Adaspańdar» qoıylymymen ashǵan bul teatrdyń kórkemdik jetekshisi jáne rejısseri Ǵalymjan Saılaýbekov. Músheleriniń 70-80 paıyzyn fılologııa fakýltetiniń stýdentteri quraıtyn óner ujymy ózderi sahnalaǵan barlyq týyndynyń stsenarııin ózderi jazǵan bolatyn. Bul úrdis bul joly da óz jalǵasyn taýyp otyr.
