Stýdentter tarıh pánin oqytýǵa arnalǵan «TarikhMap» ınnovatsııalyq platformasyn ázirledi
ASTANA.KAZINFORM — Qazaq ulttyq qyzdar pedagogıkalyq ýnıversıtetiniń PhD doktory, aǵa oqytýshy Aıjan Qońyrovanyń jetekshiligimen stýdentter toby tarıh sabaqtarynda ınteraktıvti tsıfrlyq kartalar men jasandy ıntellekt tehnologııalaryn tıimdi qoldanýǵa baǵyttalǵan «TarikhMap» ınnovatsııalyq platformasyn ázirledi.
«TarikhMap» platformasynyń negizgi maqsaty – tarıh pánin oqytýdy tsıfrlandyrý, bilim alýshylardyń pánge degen qyzyǵýshylyǵyn arttyrý jáne pedagogterdiń ýaqytyn tıimdi uıymdastyrýǵa múmkindik jasaý.
Búginde ýnıversıtet stýdentteri pedagogıkalyq praktıka barysynda atalǵan tsıfrlyq júıeni belsendi paıdalanyp, jańa taqyryptardy túsindirýde, memleketterdiń aýmaqtyq ózgeristerin tanystyrýda jáne tarıhı oqıǵalardyń ótken oryndaryn ınteraktıvti formatta kórsetýde qoldanyp keledi. Bul óz kezeginde oqýshylardyń kórneki qabyldaýyn kúsheıtip, aqparatty este saqtaý qabiletin arttyrýǵa yqpal etedi.
Sonymen qatar tsıfrlyq kartalardyń múmkindikteri oqý baǵdarlamasy materıaldaryn bekitýge, úı tapsyrmalaryn tekserýge jáne joǵary synyp oqýshylaryn ulttyq biryńǵaı testileýge (UBT) daıarlaý úderisinde joǵary tıimdilik tanytyp otyr.
Joba pedagogıkalyq baǵyttaǵy stýdentter men muǵalimderdiń sapaly tsıfrlyq bilim berý kontentine qol jetkizý máselesin sheship qana qoımaı, bolashaq mamandardyń aqparattyq tehnologııalar salasyndaǵy quzyretterin damytýǵa jáne olardyń kásibı ári kásipkerlik áleýetin arttyrýǵa múmkindik beretin zamanaýı bilim berý quraly retinde erekshelenedi.
Atalǵan platforma «Startup-Tomiris» baıqaýynda úzdikter qatarynan kórinip, 1 mln teńge kólemindegi qarjylaı grantqa ıe boldy. Qazirgi tańda platforma Almaty qalasy men Almaty oblysyndaǵy birqatar mektepterdiń oqý úderisine kezeń-kezeńimen engizilip keledi.
Aıta ketelik ǵylym, ınnovatsııa jáne jasandy ıntellekt: Qazaqstan Eýropamen yntymaqtastyqty keńeıtedi.
