Stýdentter shpargalkadan bas tartty
ALMATY. 17 mamyr. QazAqparat /Ádilet Musahaev/ - Keshe Ó.A.Joldasbekov atyndaǵy Stýdentter saraıynyń aldynda «Antı shpora» aktsııasy ótti.
Shara ál-Farabı atyndaǵy QazUÝ Stýdentter senaty janyndaǵy Bolon úderisi boıynsha Stýdenttik bıýronyń bastamasymen, atalǵan ýnıversıtet stýdentteriniń uıymdastyrýymen ótti.
Sessııa ýaqytyndaǵy bul shara stýdentterdi emtıhan tapsyrý barysynda «shpargalka» qoldanbaýǵa shaqyrady. QazUÝ stýdentteriniń paıymdaýynsha, «shpargalka» qoldaný, stýdenttiń ózin-ózi aldaýmen jáne oqytýshyny aldaýmen para-par. Al «aldaý» arqyly emtıhan tapsyrý básekege qabiletti maman daıarlaýǵa kereǵar bolmaq. Stýdentter aktsııany sessııa ýaqytynda ótkizýi de tegin bolmasa kerek. 1500-den asa stýdent qatysqan «Antı shpora» aktsııasy barysynda belsendiler shpargalkadan bas tartyp, sonyń aıasynda jemqorlyqqa jol bermeýge úndedi. Olar «Taza sessııa» uranyn kóterip, paraqorlyqqa jol bermeýge shaqyrdy.
Shara kezinde stýdentter shpargalka beınesindegi paraqshalardy órtep, stýdenttik qoǵamdaǵy aldaýlardyń aldyn alýdy nasıhattady. Oǵan QazUÝ stýdentteri, fakýltet dekandary jáne ýnıversıtettiń oqytýshy-professorlar quramy qatysty.
«Stýdent shpargalka qoldaný arqyly ózin de, ózgeni de aldaıdy. Mundaı jolmen emtıhan tapsyrǵan stýdentten básekege qabiletti maman shyqpasy anyq. Endeshe stýdentter ózderi bastama tanytyp otyrǵan bul «Antı shpora» aktsııasy óte oryndy dep bilemin. Shpargalkadan bas tartý arqyly stýdentter paraqorlyq pen jemqorlyqqa da jol bermeıdi», - deıdi QazUÝ rektory Ǵalymqaıyr Mutanov.
Al Jastar uıymdarymen jumys jónindegi bólim mamany, ıgi shara uıymdastyrýshylarynyń biri Sandýǵash Kartaeva qazirgi kezde stýdentterdiń shpargalka qoldanatyndyǵyn, biraq, kóptegen oqý oryndary muny jasyryp qalǵysy keletindigin aıtady.
