Stýdentter robototehnıka men ushqyshsyz júıeler boıynsha jobalaryn tanystyrdy
KÓKShETAÝ. KAZINFORM — 13-15 tamyz aralyǵynda Aqmola oblysynda elimizdiń túkpir-túkpirinen jınalǵan ınjenerlerdi, ázirleýshilerdi, áskerı qyzmetshiler men joǵary oqý oryndarynyń stýdentterin biriktirgen SHAIQAS 2026 áskerı-ınjenerlik chempıonaty ótti.
Chempıonattyń fınalynda qazaqstandyq joǵary oqý oryndarynyń stýdenttik komandalary erekshe belsendilik tanytyp, ózderiniń IT jáne ınjenerlik ázirlemelerin usyndy. Jas mamandar tehnıkalyq daıarlyq deńgeıin kórsetip qana qoımaı, alǵan bilimderin praktıkalyq mindetterdi sheshýde qoldaný qabiletterin de tanytýǵa múmkindik aldy.
Bıyl chempıonatqa elimizdiń barlyq óńirinen 100-den astam komanda qatysýǵa ótinim bergen. Іrikteý qorytyndysy boıynsha fınalǵa eń myqty 20 komanda joldama alyp, óz ázirlemelerin tanystyryp, áskerı polıgon aýmaǵynda praktıkalyq synaqtardan ótti.
Stýdenttik komandalar robototehnıka, ushqyshsyz ushý apparattary, avtonomdy jerústi platformalary, baǵdarlamalaý, tsıfrlyq tehnologııalar jáne kıberqaýipsizdik baǵyttaryndaǵy ázirlemelerin kórsetti. Usynylǵan sheshimderdiń qatarynda mobıldi robottandyrylǵan platformalar, qaýipti aımaqtardan adamdardy evakýatsııalaýǵa arnalǵan tehnologııalar, túrli maqsattaǵy ushqyshsyz ushý apparattary jáne basqa da ınjenerlik jobalar bar.
SHAIQAS 2026 chempıonatynyń mańyzdy erekshelikteriniń biri – stýdentterge óz ázirlemelerin zerthanalar men oqý polıgondarynan tys, praktıkalyq qoldanýǵa barynsha jaqyn jaǵdaılarda synaqtan ótkizýge múmkindik berilýi. Qatysýshylar áýe jáne jerústi ushqyshsyz júıeler, kıberqaýipsizdik jáne taktıkalyq daıarlyq baǵyttary boıynsha baq synap, óz sheshimderiniń senimdiligin, fýnktsıonaldyǵy men tıimdiligin tekserdi.
Stýdentter úshin chempıonatqa qatysý ázirleý men baǵdarlamalaýdan bastap daıyn sheshimdi naqty jaǵdaılarda synaýǵa deıingi praktıkalyq ınjenerlik jumystyń tolyq tsıklinen ótýge múmkindik berdi. Sonymen qatar komandalar áskerı, ónerkásiptik jáne tehnologııalyq sektor ókilderimen ózara tájirıbe almasyp, kásibı pikir alyp, jobalaryn odan ári damytý perspektıvalaryn baǵalaı aldy.
SHAIQAS 2026 stýdentterdiń ıdeıalaryn prototıp pen baǵdarlamalyq sheshimnen bastap, naqty jaǵdaılarǵa barynsha jaqyn ortada synaqtan ótkizýge deıin praktıkada tekserýge múmkindik bergen biregeı alańǵa aınaldy. Mundaı format jastardyń ınjenerlik oılaý qabiletin, kásipkerlik kózqarasyn jáne tehnologııalyq quzyretterin damytýǵa, sondaı-aq joǵary oqý oryndary, memleket, qorǵanys salasy men ındýstrııa arasyndaǵy ózara baılanysty nyǵaıtýǵa yqpal etedi.
Aıta ketelik Qazaqstanda alǵashqy áskerı-ınjenerlik chempıonat ótip jatqany týraly jazǵan edik.
