Stýdentter para bere me - «Jas Otan» zertteýi

NUR-SULTAN. QazAqparat – «Jas Otan» jastar qanaty júrgizgen saýalnama qatysqan stýdentterdiń 10 paıyzy para bergendikterin aıtqan. Bul týraly búgin «Nur Otan» «Jas Otan» jastar qanatynyń jetekshisi Elnur Beısenbaev málim etti, dep habarlaıdy QazAqparat tilshisi.

Onyń aıtýynsha, 2019 jyldyń 27 qarashasy men 2020 jyldyń 14 aqpany aralyǵyn «taza sessııa» aktsııasynyń ekinshi kezeńi ótkizilip, oǵan qatysqan 20 710 stýdent jasyryn túrde pándik 21 suraqqa jaýap bergen.

«Saýalnama qatysqan stýdentterdiń 63,3 paıyzy 15 óńir men Nur-Sultan, Almaty jáne Shymkent qalalaryndaǵy 64 jekemenshik joǵary oqý oryndarynda ekinshi jáne odan joǵary kýrstarda oqıdy. Shamamen 23 paıyzy memlekettik grantpen bilim alyp jatyr. Jalpy, bizde 70-ten astam jekemenshik joǵary oqý orny bar. Degenmen, únemi ádildik jaıynda aıtatyn keıbir joǵary oqý orny bul sharaǵa qatyspady. Olar: QMEBI men Narxoz. «Siz oqıtyn JOO-da sybaılas jemqorlyq bar ma?» degen saýalǵa qatysýshylardyń 12,5 paıyzy «ıá» dep jaýap bergen. Respondentterdiń 33 paıyzy mundaı faktilermen ózderi nemese týystary men tanystary betpe-bet kelgenin aıtqan. Al 23 paıyzy syıbaılas jemqorlyq jaıynda BAQ-tan nemese ózge de derekkózderden estigen. Jalpy, saýalnamaǵa sáıkes, oǵan qatysýshylardyń 10 paıyzy para bergen», - dedi E.Beısenbaev.

Sonymen qatar ol saýalnama stýdentter arasynda sybaılas jemqorlyq faktileri túrtki bolatyn negizgi jaıttardy da anyqtaýǵa múmkindik bergenin aıtady.

«Stýdentterdiń pikirinshe, sybaılas jemqorlyq faktileri dıplomdyq jumystar, aralyq baqylaý, kýrstyq jobalar jáne jataqhanaǵa ornalasý barysynda jıi oryn alady», - dedi «Jas Otan» jastar qanatynyń jetekshisi.