Stýdentter óndiristik tájirıbeden ótýge zań júzinde mindettelmek - BǴM
ASTANA. QazAqparat - Qazaqstanda stýdentter óndiristik tájirıbeden ótýge zań júzinde mindettelmek. Bul týraly búgin Májiliste «Qazaqstan Respýblıkasynyń keıbir zańnamalyq aktilerine bilim berý máseleleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.
«Zań jobasy boıynsha zańnama deńgeıinde stýdentterdiń kásiporyndardan óndiristik tájirıbeden ótýin mindetteý bekitiledi. Budan bólek, standarttar boıynsha tehnıkalyq jáne kásiptik bilim berýdi tegin negizde júzege asyrý usynylady. Aıta keterligi, ondaǵy stýdentter de tájirıbeden ótedi. Alaıda, olar vedomstvolyq túrde mınıstrlikke baǵynbaıtyn uıymdardan ótip júrgendikten, biz óndiristik tájirıbelerdi tegin negizde júzege asyrýdy zańnamada qamtýdy usynamyz. Osyǵan oraı, ulttyq kásipkerler palatasymen jumys isteýdemiz, maqsatymyz atalǵan normanyń tolyqqandy qamtylýy», - dedi Bilim jáne ǵylym vıtse-mınıstri Tahır Balyqbaev.
Bul rette vıtse-mınıstr jyl saıyn 25-30 myńǵa tarta mektep bitirýshiler joǵary oqý oryndary men kolledjderge oqýǵa barmaıtynyn, sonyń saldarynan eshqandaıda kásiptik bilimge ıe emestigin atap ótedi.
«Sondyqtan da, tehnıkalyq jáne kásiptik kolledjderde tegin oqytý týraly bul norma asa qomaqty qarajatty talap etedi. Degenmen, 2019 jyldyń 1 qyrkúıeginen osy normanyń jumys istegenin qalaımyz», - dedi ol.
