Stýdentter metrony nasıhattaý úshin 8,3 metrlik tátti nan pisirdi -Almaty

Ál-Farabı atyndaǵy Qazaq ulttyq ýnıversıtetiniń 100-den astam stýdenti qatysqan bul sharada jastar metropolıtendi nasıhattaýdyń ózindik úlgisin tapty. Olar metronyń alǵashqy jelisiniń 8,3 shaqyrymdyq birinshi kezeńiniń uzyndyǵyna sáıkes qazirgi tańda qyzmet kórsetip otyrǵan jeti bekettiń ataýy «Raıymbek batyr», «Jibek joly», «Almaly», «Abaı», «Baıqońyr, «Áýezov» jáne «Alataý» beketteri ásemdelgen 8,3 metrlik tátti nan pisirdi. Odan metropolıtenniń barlyq jolaýshylary dám tatyp, QazUÝ stýdentteriniń kontserttik qoıylymdaryn tamashalady. Taqyryptyq vıktorınalarǵa qatysyp, jeńimpaz atanǵandardy metropolıten basshylyǵy jınaqtaýshy kartochkalarymen marapattady.

«Biz jastardy bizdiń bastamamyzdy qoldap, metro qyzmetin qoldanýǵa shaqyramyz. Bul tıimdi, yńǵaıly, qaýipsiz ári tabıǵı taza kólik túri. Bizdiń metro eń ádemi metrolardyń biri. Árbir beket ózinshe erekshe. Jýyq arada taǵy da beketter qosylyp, metropolıtendi odan da tanymal etedi», - deıdi bul sharaǵa qatysýshy Nurzına Qydyralına.

«Elbasy Joldaýynda Prezıdent eldegi ınjenerlik bilim júıesi men zamanaýı tehnıkalyq mamandyqtarǵa basa nazar aýdardy. Búginde metropolıtende 400-den asa jas maman qyzmet etedi. Bul qyzmetkerlerdiń teń jartysyna jýyǵy. Kúni keshe biz ártúrli oqý oryndarynyń túlekteri edik, al búgin serpindi damyp otyrǵan kásiporynda jumys isteımiz. Biz jumys barysynda jańa ıdeıalar men ınnovatsııalardy óndiriske endiremiz. Men, osynda qatysýshy stýdentterdiń kóbi, erteń bizdiń áriptesim atanady dep senemin», - deıdi metropolıtenniń elektrojumys bastyǵynyń orynbasary Nurlan Berdiǵojın.

2011 jyly 1 jeltoqsanda iske qosylǵan Almaty metrosy 2012 jyldyń qorytyndysy boıynsha Tel-Avıv qalasynda ótken Halyqaralyq «Altyn arba» syılyǵynyń laýreaty atandy. Onyń qyzmetin paıdalanýshylar sany ótken jyly 6 mıllıonnan asqan bolatyn. Endi 2014 jyldyń birinshi jartysynda «Saıran» men «Máskeý» beketi iske qosylady dep josparlanýda. Sol kezde onyń uzaqtyǵy 6,1 shaqyrymǵa jetpek.