Stýdentter men oqytýshylardyń akademııalyq múmkindikteri keńeıedi — Senat
ASTANA. KAZINFORM — Búgin Senattyń jalpy otyrysynda «Joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasyn ratıfıkatsııalaý týraly» Zańy maquldandy.
— 2011 jylǵy 26 qarashada Tokıoda qol qoıylǵan Konventsııa Azııa-Tynyq muhıty aımaǵynda joǵary bilim salasyndaǵy biliktilikti taný salasyndaǵy yntymaqtastyqty ornatýǵa baǵyttalǵan. ıÝNESKO aıasynda ázirlengen bul Konventsııada dıplomdar, akademııalyq dárejelerdi taný rásimin jeńildetý, olardy baǵalaýda ashyqtyq pen ádilettilikti qamtamasyz etý, sondaı-aq óńir elderi arasyndaǵy akademııalyq jáne kásibı utqyrlyqty keńeıtý maqsat etilgen. Tokıo konventsııasyna Aýǵanstan, Armenııa, Aýstralııa, Qytaı, Fıdjı, Japonııa, Mońǵolııa, Jańa Zelandııa, Koreıa Respýblıkasy, Reseı jáne Túrkııa sııaqty on eki memleket kiredi, — dedi senator Ásem Rahmetova.
Zań erejeleri boıynsha Konventsııany ratıfıkatsııalaý oǵan múshe elderdiń joǵary bilimge qatysty biliktilikti taný jónindegi ulttyq aqparattyq ortalyqtarynyń aımaqtyq jelisine (APNNIC) kirýdi kózdeıdi.
Bul ortaq jeli arqyly sheteldik dıplomdardyń túpnusqalyǵyn rastaý, joǵary bilim berý júıesiniń sapasy men jumys isteýin qamtamasyz etý, sondaı-aq olardy taný rásimi úshin qajet málimetterdi qamtamasyz etý máseleleri boıynsha jedel aqparat almasýǵa jaǵdaı jasalǵan.
— Konventsııaǵa qosylý azamattarymyzdyń dıplomdary men biliktiligin Azııa-Tynyq muhıty óńiri elderinde tanytýǵa, stýdentter men oqytýshylardyń akademııalyq mobıldik múmkindikterin jeńildetýge, ulttyq bilim júıesiniń tartymdylyǵyn arttyrýǵa, azamattardyń shetelde kásibi boıynsha jumysqa ornalasýyna múmkindik beredi. Konventsııany ratıfıkatsııalaý kezinde Qazaqstan Respýblıkasy beıresmı oqý úlgileri arqyly alynǵan biliktilikter men ishinara oqý kýrstaryn tanýǵa qatysty 4-baptyń 7-tarmaǵyna, 5-baptyń 1,2 tarmaqtaryna, 6-baptyń 3-tarmaǵyna, 8-baptyń 4-tarmaǵyna eskertpe jasaıdy. Tokıo konventsııasyna qosylý Qazaqstan men búkil Ortalyq Azııadaǵy bilim berýdi damytý jolyndaǵy mańyzdy qadam. Zańnyń qabyldanýy teris saıası, quqyqtyq, qarjy-ekonomıkalyq jáne ózge de saldarlarǵa alyp kelmeıdi, — dedi depýtat.
Eske salsaq, joǵary bilim berý salasyndaǵy biliktilikti taný týraly Azııa-Tynyq muhıty óńirlik konventsııasyn Májilis byltyr qarasha aıynda qabyldaǵan bolatyn.