Stýdentter, medqyzmetkerler: Atyraý oblysynda koronavırýstyń jańadan 6 jaǵdaıy anyqtaldy
ATYRAÝ. QazAqparat – Atyraý oblysynda koronavırýs indetine shaldyǵýdyń jańadan 6 oqıǵasy tirkeldi. Barlyǵy óńirde 12 naýqas anyqtaldy, dep habarlaıdy QazAqparat tilshisi.
Densaýlyq saqtaý basqarmasynan málim etkendeı, sońǵy anyqtalǵan 6 naýqastyń ekeýi – 25 jáne 50 jastaǵy áıel adamdar. Olar 21 naýryz kúni «Nur-Sultan-Atyraý» baǵytyndaǵy poıyzben kelgen. Aıta keteıik, osy poıyzben koronavırýs ınfektsııasy anyqtalǵan boıjetken de kelgen bolatyn. Ol 27 naýryzda aýrýhanaǵa jatqyzyldy.
Taǵy eki adam - «Almaty-Atyraý» avıareısimen kelgen 14 jastaǵy qyz balamen baılanysta bolǵandar. Olar – 21 jastaǵy qyz ben jigit, ekeýi de stýdentter.
Sońǵy eki adam – Atyraý qalalyq №3 emhanasynyń medıtsına mamandary. 46 jáne 47 jastaǵy qyzmetkerler indetti juqtyrǵan áıel adammen baılanysta bolǵan.
«Qazirgi ýaqytta naýqastar oqshaýlandy jáne emderin qabyldaýda. Olarmen qarym-qatynas jasaǵan adamdardy izdestirý jumystary júrgizilýde», - dedi basqarmadan.
