Stýdentter Májilis depýtatyna birqatar mańyzdy máselelerdi sheshýge yqpal etýdi surady

TARAZ. QazAqparat -Májilis depýtaty Meırambek Tólepbergen Muhammed Haıdar Dýlatı atyndaǵy Taraz óńirlik ýnıversıtetiniń stýdentterimen kezdesip, jastar arasyndaǵy ózekti máselelerdi talqylady, dep habarlaıdy QazAqparat tómengi palatanyń baspasóz qyzmetine silteme jasap.

Stýdentter depýtatqa oılaryn erkin jetkizip, ózderin tolǵandyrǵan suraqtaryn qoıdy. Atap aıtqanda, Erbol Tilepaev Tarazǵa kelip, bilim alyp jatqan sheteldik, ıaǵnı Túrikmenstannan, Mońǵolııadan jáne Qytaıdan kelgen stýdentterge qosymsha jumys isteýge ruqsat berilmeıtinin, rásimdelgen vıza boıynsha oqýdan basqa eńbek etip, tabys tabýyna múmkindigi joǵyn sóz etti.

Óz kezeginde, Jasulan Eseneı stýdenttik kásipkerlik máselesi týraly, onyń ishinde bıznespen aınalysamyn degen jastar úshin ǵımarat pen jerdi jalǵa alý barysynda jeńildikter qarastyrylsa degen ótinish aıtty. Al, Marjan Tólegen bilimdi jastardyń shetelge kóship ketý máselesine toqtalyp, depýtattyń osyǵan qatysty pikirin surady.

Kezdesý sońynda ýnıversıtet rektory Talǵat Eshenqulov Dýlatı jastarynyń qoǵamdaǵy máselelerge beı-jaı qaramaıtyn belsendi ekendikterin atap ótti.

Májilis depýtaty atalǵan problemalardy nazarǵa alyp, tıisti deńgeıge kóteretinin jetkizdi.