Stýdentter kınologııalyq ortalyqta boldy
ASTANA. 16 mamyr. QazAqparat - Jýyrda Kóliktegi ІІD Esirtki bıznesine qarsy kúres basqarmasy men Kólik jáne kommýnıkatsııa kolledji basshylyǵy birlesip,
temirjol qurylysy fakýltetiniń 2-kýrs stýdentteri arasynda «Esirtkiden bas tart» is-sharasyn ótkizgen edi.
Osy is-sharada esirtki zattardy tabýda óz yqpaldaryn tıgizip júrgen kınologııalyq ortalyqtyń qyzmetimen tańystyryńyzshy degen jastar nıetine Esirtki bıznesine qarsy kúres basqarmasynyń aǵa jedel ýákili, polıtsııa kapıtany Orynbaı Dúısembıev ýádesin bergen edi. Kópke aparmaı ýádesin oryndap, taıaýda kolledj stýdentteri kınologııalyq ortalyqtyń qyzmeti naqty aıtqanda ıisshil ıtterdiń esirtki, jarylǵysh zattardy tabý daǵdylaryna kýá boldy.
Ortalyqtyń qyzmetkerleri - polıtsııa aǵa leıtenanty Ardaq Bekmurat jáne polıtsııa aǵa serjanty Erjan Qappasov «Heppı», «Mono» laqap atty ıisshil ıtterdi paıdalanyp, qoraptardyń ishine jasyrylǵan zattardy tez arada taýyp, jastardyń qoshemetine bólendi. Zattardy taýyp ǵana qoımaı, sonymen birge óz jattyqtyrýshylarynyń ár túrli pármenderin buljytpaı oryndap, jınalǵan qaýymdy tań qaldyrdy.
«Esirtki zattardy izdestiretin ıtter esirtkimen qorektenedi dep estidik. Sol shyn ba?» degen suraqqa Kınologııalyq ortalyqtyń bastyǵy polıtsııa maıory Qanat Jakenov: munyń barlyǵy bos sóz, esirtkige táýeldi ıt uzaq jyl qyzmet ete almas edi. Ekinshiden, ol esirtkini biz kúnde qaıdan taýyp berip otyramyz - dep jaýap qaıtardy. Al, esirtki, jarylǵysh zattardy ıtter «oıyn» ádisi boıynsha tabatynyn aıtyp, jattyqtyrý tásilderimen bólisti. Áýe jáne temir jol arqyly esirtki zatyn tasymaldap, ońaı aqshaǵa tap bolamyn degender túbinde abaqtydan shyǵatynyn túsingen jastar shara sońynda «Heppı» men «Monony» ortaǵa shaqyryp estelik sýretke tústi", - dep habarlady Kóliktegi Іshki ister departamentiniń baspasóz qyzmeti.
Іs-shara barysynda esirtkiniń zııany týraly kitapshalar men jýrnaldar taratyldy.
