Stýdentter kelýimen baspana qymbattady ma: Almatydaǵy jaldamaly páter baǵasyna sholý

Shilde aıynda Almatyda bir bólmeli páterdi jaldaý ortasha eseppen shamamen 220 myń teńgege shyǵatyn. Al kúz bastalǵaly ol 250 myń teńgege jetken. Eki bólmeli páterlerdiń ortasha jaldaý aqysy 350 000 teńge, al úsh bólmeli páterler boıynsha baǵam — 500 000 teńge.

Ornalasqan aýdany, páterdiń jaǵdaıy, kólemi páter aqysyna áser etetini belgili. Sony eskere kele, ártúrli segmentti qarastyrdyq.

1 bólmeli páterler — 90 myńnan 1 mln teńgege deıin

Eń arzan degen páterler Almatyda 90 myń teńgeden bastalady. Sonyń bireýi — Jetisý aýdanyndaǵy 15 sharshy metrlik bólme eken. Іshinde tek eski dıvan bar.

Al ekinshisi — Naýryzbaı aýdanynda 11 sharshy metr bolatyn «úı» nemese saraı. Sondaı-aq 30 myń teńge depozıti bar.

Demek mundaı jerlerdiń sharshy metri shamamen 8000-9000 teńgege baǵalanady.

Dál osyǵan uqsas 12-14 sharshy metrlik páterler metro mańynda ornalassa, baǵa edáýir kóbeıedi eken. Máselen «Máskeý» stantsııasynyń janynda ornalasqan «stýdıo» formatyndaǵy páterler — 140 myń men 200 myń teńge aralyǵynda.

Qala ortalyǵynan alystaý bolatyn Naýryzbaı aýdanynda jóndeý jasalǵan, jıhazy bar 1 bólmeli páterdi 200 myń teńgege tabýǵa bolady.

Medeý aýdany ortalyq bolyp sanalatyndyqtan, baǵa eki ese derlik joǵary. Munda 1 bólmeli páterdi 400-450 myń teńgege jaldaı alasyz.

Áýezov aýdanynan páterdi jaldaýǵa da kóptiń qaltasy kótermeıdi. Mysaly eki adamnyń kereýeti ornalasqan páter úshin úı ıesi 570 myń teńge suraıdy. Eki adam bólip tólegen kúnniń ózinde ol 285 myń teńgeden shyǵady. Onymen qosa depozıt aqysy bar.

Al ortalyqqa jatatyn Bostandyq aýdanyndaǵy páterler — shamamen 230-250 myń teńge aralyǵynda. Degenmen páterlerdiń jóndeý jumysy ortasha deńgeıde ekenin jáne jıhazy eskileý keletinin eskergen jón.

Osy aýdannan lıýks sapadaǵy 1 bólmeli páter kóremin deseńiz, 600 myńnan 1 mıllıon teńgege deıingi baǵalarǵa daıyn bolý kerek.

2 bólmeli páterler — 120 myńnan 4,9 mln teńgege deıin 

Baǵasy tómen 2 bólmeli páterler Alataý, Túrksib aýdandarynda ornalasqan, shamamen quny 120-130 myń teńge bolady. Alaıda jıhazben tolyq qamtylmaǵan nemese eski ekenin baıqaýǵa bolady.

Almaly, Áýezov aýdandarynda eki bólmeli páterlerdi 300-450 myń teńgeden taba alasyz.

Medeý aýdanynda baǵa jarty mıllıonnan asady.

Sonymen qatar Bostandyq aýdanyndaǵy elıtaly páterlerdi 2,5 mıllıon-4,9 mıllıon teńgeden jalǵa alýǵa bolady eken.

3 bólmeli páterler 210 myń teńgeden 3,5 mln-ǵa jetti

3 bólmeli páterlerdiń tómen baǵasy 210-230 teńgeden bastalady. Ádettegideı olar ortalyqtan alys Alataý, Almaly aýdandarynda ornalasqan.

Degenmen osy aýdannan jóndeý jumysynyń sapasy joǵary, jıhazy jańa nusqalary 450 myń teńge shamasynda bolady.

Al qala ortalyǵyndaǵylardyń aqysy 700-750 myń teńgege jetti.

Sondaı-aq 3,5 mıllıon teńge bolatyn elıtalyq nusqalary bar ekenin baıqadyq.

Almatylyqtar páter jaldaý qymbat ekenine shaǵymdandy

Jelide Almatydaǵy páter jaldaý qunyna qatysty syn kóp.

Jeli qoldanýshysy úı ıelerine úndeý jasady.

— 200 000–300 000 teńgege páter jaldaý qalypty jaǵdaı dep oılaısyzdar ma? Iá, siz páterdi ıpotekamen satyp aldyńyz. Biraq nege jalǵa alýshy sizdiń aı saıynǵy tólemińizdi tolyǵymen jabýy kerek? Óıtkeni, páter saıyp kelgende, sizdiń menshigińiz, al jyldar boıy úlken soma tólep kelgen adam eshteńesiz qalady. Sonymen qatar Qazaqstanda 200 000 teńge de tappaıtyndar kóp. Sol úshin birneshe adam bop turýǵa májbúr bolady, — dedi jeli qoldanýshysy. 

Taǵy biri habarlandyrýdy bólisip, máseleni ázilmen jetkizdi. Jóndeý jumysy júrgizilmegen, jıhazy joq eki bólmeli páter 150 myń teńgege berilip jatyr eken.

— Depozıt 50 myń teńge. Kelip, tura berińder. Esesine qysta bastaryńa qar tıip, jańbyrda sý tımeıdi, ary qaraı amaldap alarsyńdar, — dep jazdy Araılym Nurbolatqyzy. 

Usynystan suranys kóbirek

Qarjy mamany Temirlan Esenniń aıtýynsha, Qazaqstanda sońǵy bes jylda páter jaldaý baǵasy tómendegen emes. Oǵan ınflıatsııa da, suranystyń kóp bolýy da sebep ekenin aıtady.

— Jaldaý aqysynyń qymbattaýyna eń aldymen suranys pen usynystyń arasyndaǵy teńsizdik sebep. ıAǵnı baspana izdeıtinder kóp bolǵanymen, naryqtaǵy páter sany jetkiliksiz. Ásirese Almaty men Astana sekildi iri qalalarǵa oqý, jumys jáne basqa da maqsattarmen kelýshiler kóp bolǵandyqtan, turǵyn úıge degen suranys arta túsedi. Bul óz kezeginde páter ıelerine jaldaý aqysyn kóterýge múmkindik beredi, — dedi maman.

Sózinshe, jaldaý quny naryqtaǵy suranysqa baılanysty qalyptasady. Sondyqtan máseleni sheshýdiń negizgi joly — turǵyn úı tapshylyǵyn azaıtyp, usynysty kóbeıtý.

Bul baǵytta jergilikti ákimdikter jalǵa beriletin áleýmettik jáne qoljetimdi turǵyn úı qoryn arttyryp, jer bólý men qurylys kólemin ulǵaıta alady. Al memleket turǵyn úı qurylysyn yntalandyryp, halyqtyń baspana satyp alý múmkindigin keńeıtýi qajet deıdi.