Stýdentter Qazaqstannyń ǵarysh kartasyn jasaıdy
ASTANA. QazAqparat - «Geodezııa jáne kartografııa» mamandyǵy boıynsha bilim alyp jatqan S. Seıfýllın atyndaǵy qazaq agrarlyq ýnıversıtetiniń stýdentteri ǵarysh túsirilimderiniń rastrlyq negizderin quraý boıynsha arnaıy brıgadalarda jumys isteýde. Bul týraly «QazAqparat» HAA tilshisine geoaqparattyq júıeler ortalyǵynyń dırektory Farabı Ermekov aıtty.
«Bir aı buryn 1-4 kýrs stýdentteri arasynda uran tastaldy. Sabaqtan tys ýaqytta mamandyq boıynsha jumys júrgizetin brıgada quramyz. Aldaǵy ýaqytta aqyly jumys kólemin alýǵa tyrysamyz. Tıisinshe, balalardyń mamandyq boıynsha aqsha tabý múmkindigi bar, olar stýdenttik jyldarynda eńbek kitapshasyn ala alady. Buǵan birden 200 stýdenttiń 120-sy jazyldy, - dep atap ótti F. Ermekov.
Stýdenttik brıgada - ashyq paıdalanýdaǵy ǵarysh túsirilimderinen Qazaqstannyń rastrlyq negizin qurý mindetin tańdady. Stýdentter 15 brıgadamen 59000 paraq karta júktedi.
«Endi bizge kompıýterlik synyptardan stýdentterdi qýýǵa týra keledi. 37 kompıýterde táýliktep jumys jasalady. Derekter aǵynyn qabyldap úlgermeı jatyrmyz. Qazir bizde ǵarysh túsirilimderiniń bazasy bar! Eń bastysy - stýdentterdiń qulshynysy keremet», - dep áserimen bólisti ortalyqtyń dırektory.
Kóptegen ǵylymı jáne praktıkalyq bastamalar usynǵan Farabı Ermekovtiń aıtýynsha, bul eksperımentke basqa da mamandardy tartý qajet, sonda tetiktiń qýaty on esege artady. Bul jastardyń stýdent kezinen bastap zamanaýı ǵarysh tehnologııalaryn paıdalanyp, eldiń aýqymdy jobalaryna qatysýyna yqpal etedi.
