Stýdentter Qazaqstandy shetelde nasıxattaýdyń tyń jolyn tapty

ASTANA. QazAqparat - Lev Gýmılev atyndaǵy Eýrazııa ulttyq ýnıversıtetinde alǵash ret shetel stýdentteriniń forýmy uıymdastyrylyp otyr. Negizgi maqsat - Qazaqstan jetistikterin shetelge nasıxattaýdyń tyń ádisin talqylap, basqa ýnıversıtetterge taratý, dep xabarlaıdy QazAqparat tilshisi.

Ýnıversıtet rektory Erlan Sydyqovtyń aıtýynsha, atalǵan joǵary oqý ornynda oqyp júrgen shetel stýdentteri tyń bastamany ózderi kóterdi. «Olar: «Bir jyldyń ishinde Qazaqstanda rýxanı jańǵyrýǵa qatysty biraz sharalar atqaryldy. Sony óz kózimizben kórip, tánti boldyq. Bizge qatty unap otyr. Qazir demalysqa shyǵyp jatyrmyz. Endi, osy jerde kórip-bilgenimizdi óz elimizge jetkizsek, xalqymyzǵa oı salyp, nasıxattasaq», - deıdi. Osyǵan baılanysty arnaıy forým uıymdastyrylyp otyr. Bunyń barlyǵy - óz ýnıversıtetimizde oqyp jatqan 500 shetel stýdenti men 50 shaqty sheteldik ǵalymnyń bastamasy. Olar bir aptadan keıin demalysqa shyǵyp, óz elderine qaıtady. Sonda Qazaqstandaǵy qazirgi ózgeristerdi óz elimizge de aıtamyz dep otyr», - dedi E.Sydyqov QazAqparat tilshisine bergen suxbatynda.

Rektordyń sózine qaraǵanda, ýnıversıtet Prezıdenttiń "Rýxanı jańǵyrý. Bolashaqqa baǵdar" atty maqalasyn alty tilge aýdaryp, barlyq materıaldardy shetel stýdentterine taratyp bergen.

"Olar eki baǵytty usyndy. Bireýin "1001 qadam" dep atady. Biz árqaısysymyz úsh aıdyń ishinde Qazaqstanǵa qatysty "1001 qadam" jasaýymyz qajet dedi. Áleýmettik jelide aıtarymyz bar, Qazaqstan týraly kitaptardy taratamyz, bolmasa, jergilikti teledıdar men gazet arqyly aqparat beremiz dep, ózderi osyndaı mindet alyp otyr. Men ózim Qazaqstan rektorlary keńesiniń tóraǵasy bolǵannan keıin ózimniń áriptesterime de osy bastamany qolǵa alýdy usynyp otyrmyn. Óıtkeni Qazaqstanda 13 myńnan astam sheteldik stýdent oqıdy. Olardyń barlyǵy jazda óz elderine qaıtady. 13 myń adam Qazaqstan týraly aıtsa, óz elimizdi keńinen tanyta alamyz. Osyny basqa ýnıversıtetter ary qaraı alyp ketedi degen úmit bar", - dep atap kórsetti E.Sydyqov.