Stýdentter qan tapsyryp, túsken aqshany Arys halqyna aýdarýda
«Qazaqstan stýdentter alıansy respýblıkalyq uıym bolǵandyqtan, Túrkistan oblystyq jáne Shymkent qalalyq shtabtarymyz bar. Bizde Arys qalasynda eki kolledj ornalasqan. Onda 800-den astam stýdent oqıdy. Sol stýdentterden túsken aqparatqa sáıkes, bizdiń Alıans birden halyqqa kómek kórsetý jumystaryn bastap ketken. Qazirgi ýaqytta jergilikti atqarýshy organdarmen birlese volonterlik shtabtar quryldy. Sol aýmaqtaǵy aýyldyq jerlerge kóshirý jumystary júrgizilýde. Áleýmettik jeli damyǵandyqtan, jeli arqyly barynsha kómek tartý jumystary júrgizilýde. Stýdentter osy ýaqytqa deıin qanshama ata-analarǵa balasyn taýyp berdi», - dedi OQK-da ótken baspasóz máslıhatynda Qazaqstan stýdentter alıansynyń prezıdenti Іlııas Tústikbaev.
Onyń aıtýynsha, Túrkistan men Shymkent stýdentteri ǵana emes, jaqsylyq jasaýǵa respýblıkanyń búkil stýdentteri atsalysýda.
«Nur-Sultan qalasynyń ákiminiń orynbasarymen shuǵyl otyrys ótkizilip, elorda jastarynan Arysqa kómek retinde aktsııa bastaldy. Respýblıka 34 mekenjaıynda ornalasqan Jastar saraıynyń úshinshi qabatynda gýmanıtarlyq jáne materıaldyq kómek jınaý oryny ashyldy. Kómektesemin degen adamdar sol jerge bara alady. Sonymen qatar, elorda stýdentteri qan tapsyrý aktsııasyn bastady. Qan tapsyrǵan adamǵa 600 teńge kóleminde aqsha beriledi. Sol aqshany stýdentter Arys halqyna kómektesý úshin ashylǵan resmı shottarǵa aýdarýda», - dedi ol.
Іlııas Tústikbaev Ońtústik Qazaqstan memlekettik ýnıversıtetiniń qyzmetkerleri keshe 13 mln teńge aýdarǵanyn da aıtyp ótti. Ol ýnıversıtetke qarasty 3 jataqhanaǵa bes júzden adam jatqyzylǵan. Elordadaǵy birneshe ýnıversıtet te bir kúndik jalaqylaryn aýdaryp jatyr. L.Gýmılev atyndaǵy EUÝ rektory Arys qalasynyń turǵyndaryn, balalaryn - 1000 adamdy qabyldaýǵa múmkindik baryn jetkizgen.
«Qaıǵyly jaǵdaı oryn alǵan kúnnen bastap 150 stýdent volonterlarmen birge jumys istep jatyr. Kóbi kólikterimen halyqqa qolǵabys etýde», - dedi Іlııas Tústikbaev.
