Stýdentter «Halyqtyq qurylys» baǵdarlamasyna tartylýy múmkin – depýtattar usynys jasady

ASTANA. KAZINFORM – «Halyqtyq qurylys» baǵdarlamasyna stýdenttik jasaqtardy belsendi túrde tartý kerek. Búgin Quryltaı otyrysynda Premer-mınıstr atyna saýal joldaǵan depýtat Qanat Aıtýǵanov osyndaı bastama kóterdi.

kazahstanskıe shkolnıkı ı stýdenty
Kollaj Kazinform/Nano Banana

- Memleket basshysy kelesi jyldy Jalpyhalyqtyq qurylys jyly dep jarııalady. Demek, el damýynyń strategııalyq baǵytyn aıqyndap berdi. Osy aýqymdy bastama myńdaǵan azamatty jumyspen qamtamasyz etip, ósip kele jatqan urpaqqa jańa múmkindikter ashady. Qazaqstanda 6 mıllıonǵa jýyq jas bar, bul halyqtyń 29 paıyzyn quraıdy. Biz – álemdegi jasaryp kele jatqan ulttardyń birimiz. Sondyqtan jastardy der kezinde jumyspen qamtý – óte ózekti másele, - dedi depýtat.

Onyń aıtýynsha, «Aýyl» partııasy 2024 jyldan bastap stýdenttik qurylys toptaryn jańǵyrtyp keledi. Eki jyl buryn elde bolǵan sý tasqyny kezinde osy toptar Soltústik jáne Batys Qazaqstan oblystarynda 250 turǵyn úı salýǵa tikeleı atsalysty. Osy jumysty keńeıtý maqsatynda «Aýyl» partııasy arnaıy shtab quryp, tek qurylys salasynda ǵana emes, sonymen qatar ınjenerlik, servıstik jáne agrarlyq baǵyttarǵa arnalǵan stýdenttik toptar qurýǵa kómektesti. Osy jyldyń ózinde 78 top quramyna myńnan astam stýdent qabyldandy. 

- «Aýyl» partııasynyń osy jobasy «Halyqtyq qurylys» baǵdarlamasyn iske asyrýǵa úles qosady dep esepteımiz. Stýdent jastarǵa arnalǵan joba olardy jumyspen qamtamasyz etýge jáne el ekonomıkasyna bilikti kadrlar qalyptastyrýǵa múmkindik beredi., - dedi ol.

Osyǵan oraı Qaırat Aıtýǵanov Úkimetke mynadaı usynystar berdi:

- stýdenttik eńbek jasaqtary tájirıbesin respýblıka boıynsha qoldaý jáne jan-jaqty keńeıtý. Bul jumysqa ákimdikterdi, bıznesti jáne oqý oryndaryn qatystyrý;
- «Halyqtyq qurylys» baǵdarlamasyna stýdenttik jasaqtardy belsendi túrde tartý tetigin qarastyrý;
- elde jumys isteıtin «Jasyl el» syndy barlyq jastar uıymynyń kúshin biriktirip, olardyń qyzmetin úılestirýdi qamtamasyz etý.

- Bul sharalar Memleket basshysy júktegen mańyzdy mindetterdi oryndap qana qoımaı, eń bastysy jastarǵa óz eliniń jarqyn bolashaǵyn óz qoldarymen salýǵa beretin múmkindik, - dedi depýtat.

Buǵan deıin depýtat Aısulý Súleımen parasportqa qoljetimdilikti keńeıtýdi usynǵan edi.