Qaı sanattaǵy azamattardy áskerge shaqyrý keıinge qaldyrylady

Astana qalasy Qorǵanys isteri jónindegi departamenttiń ókili Ǵanı Artyqov áskerge shaqyrýdy keıinge qaldyrý múmkindigi kimge beriletinin túsindirdi, dep habarlaıdy QazAqparat tilshisi.

«Qoldanystaǵy zańnamaǵa baılanysty birinshi kezekte – joǵary oqý oryndarynda, arnaıy orta oqý oryndarynda kúndizgi bólimde oqıtyn azamattarǵa áskerden bosatý quqyǵy berilip otyr. Kelesi kezekte – otbasy jaǵdaılary boıynsha áskerden bosatý quqyǵy bar, onyń barlyq mán-jaıy men talaptary zańnamada kórsetilgen», - dedi Ǵanı Artyqov Astana kommýnıkatsııalar qyzmetinde ótken brıfıngte.

Taǵy aıta keterligi, avıatsııa salasynda jumys isteıtin azamattar – ushqyshtar, bortınjener men borttehnıkter áskerge shaqyrýdy keıinge qaldyra alady. Ol úshin bul azamattar naqty osy salada jumys isteýi kerek.

«Dál osyndaı keıinge qaldyrý muǵalimder men aýyldyq jerde jumys isteıtin dárigerlerge de beriledi. Oǵan qosa, arnaıy dinı bilimi bar azamattar dinı mekemelerde shtatty túrde jumys istep jatsa, olar da óz anyqtamalaryn usyný arqyly áskerge shaqyrýdy keıingi qaldyra alady», - dedi spıker.

Sondaı-aq, áskerge shaqyrylatyn 27 jasqa deıingi azamattar atqarýshy organdarda, depýtattyq laýazymda bolsa, olar da keıinge qaldyrý múmkindigin qoldana alady.

Aıta keteıik, Qazaqstanda azamattardy kúzgi merzimdi áskerı qyzmetke shaqyrý naýqany bastaldy. 2023 jylǵy 28 jeltoqsanǵa deıin Qarýly Kúshterdiń, basqa da áskerler men áskerı quralymdar qataryn 18 ben 27 jas aralyǵyndaǵy 19 myńnan astam er azamat tolyqtyrady. Sonyń ishinde myńnan astamy Astana qalasynan shaqyrylady.

Qazaqstanda 5 myńnan asam áskerı qyzmetshilerdiń 1,4 mlrd teńge kredıttik tólemi keıinge qaldyryldy. Áskerde qyzmet ótkergen 180-nen astam qazaqstandyq aqysyz negizde, 400-den astamy aqyly negizde joǵary oqý oryndaryna túsken.