Stýdentter bilim saıysyna tústi
ASTANA. QazAqparat - Qazaq memlekettik qyzdar pedagogıkalyq ýnıversıtetinde Almaty qalasyndaǵy joǵary oqý oryndarynyń stýdentteri arasynda «Tuǵyrly táýelsizdik jáne kemeńger tulǵa» atty ıntellektýaldy olımpıada ótti. Bul týraly atalǵan ýnıversıtettiń baspasóz qyzmetinen habarlady.
Qazaqstan tarıhy men Elbasy N.Á.Nazarbaevtyń ómir jolyna arnalǵan zııatkerlik olımpıadaǵa QazMemQyzPÝ-dyń «Zerde», ál-Farabı atyndaǵy QazUÝ-dyń «Alash», Turan ýnıversıtetiniń «Jas Turan», T.Rysqulov atyndaǵy QazEÝ-diń «Jas ekonomıst», ATÝ-dyń «Tehnolog» komandalary qatysty.
Zııatkerlik olımpıada 5 aınalymnan turdy. Ár top ózderin tanystyryp ótken soń tarıhı jumbaq sandardyń syryn ashyp, upaı sandaryn tolyqtyryp alǵan soń, tarıhshy mamandardyń beıne suraqtaryna jaýap berdi, «altyn qaqpaǵa» bet aldy. «Altyn qaqpa» aınalymynda ár topqa kezek-kezegimen 3 suraq qoıylyp, durys jaýabyna qaraı «qola qaqpa», kúmis qaqpalar ashylyp, altyn qaqpanyń suraǵy aǵylshyn tilinde qoıyldy. Al eń sońǵy aınalymda barlyq qatysýshy topqa ortaq saýal qoıyldy. Uly Abaı aqynnyń «45 qara sózi» jınaǵy qorapqa salynyp, ol qatysýshylarǵa tolyq sıpattalyp, jasyryldy. Qazaq halqynyń ómiri, turmysy jaıynda taraý-taraýǵa bólinip jazylǵan prozalyq shyǵarmany saıyskerler áp-sátte dál taýyp, durys jaýaptaryn berdi.
Olımpıadanyń osyndaı talaptary týraly Qyzdar ýnıversıteti Qazaqstan tarıhy kafedrasynyń meńgerýshisi A.Qaıypbaeva: «Búgingi saıystyń basty ereksheligi - joǵary oqý oryndarynyń 1 kýrs stýdentteri jáne qatysýshylardyń barlyǵy ártúrli mamandyq boıynsha bilim alýshylar, ıaǵnı bolashaq tarıhshylar emes. Sonymen qatar aǵylshyn tilinde suraq qoıylyp, sol tilde jaýap berý kerektigi de saıys sharttaryna enip otyr. Elimizdiń úshtuǵyrly til saıasatynyń negizinde saıyskerlerdiń aǵylshyn tilin meńgerý deńgeıin teksere alamyz», - dedi.
Olımpıadanyń qorytyndysy boıynsha 3-oryndy ATÝ-dyń «Tehnolog» komandasy, 2-oryndy «Jas Turan» komandasy aldy. Al birinshi oryndy «Zerde» tobynyń zerdeli qyzdary ıelendi. Barlyq topqa jáne olardyń jetekshilerine alǵys hattar men arnaıy dıplomdar, syı-sııapattar tabys etildi.
