Stýdentter arasynda ınnovatsııalyq ıdeıalardyń baıqaýy jarııalandy
ASTANA. QazAqparat - Shymkentte stýdentter arasynda ınnovatsııalyq ıdeıalardyń baıqaýy jarııalandy. Bul týraly qala ákimi Ǵabıdýlla Ábdiraxymov M.Áýezov atyndaǵy OQMÝ stýdentterimen kezdesý barysynda aıtty.
Shahar basshysynyń aıtýynsha, baıqaý daryndy da talantty jastardyń qabiletin arttyryp, stýdentterdi ǵylymmen shuǵyldanýǵa, sonymen qatar, ózderiniń jobalary men jańa ıdeıalaryn iske asyrýǵa múmkindik beredi. Árbir stýdent bul baıqaýdyń qatysýshysy bola alady.
Baıqaý 5 baǵyt boıynsha ótkiziledi. Komıssııa músheleri árbir sala boıynsha úzdik degen úsh jobany tańdap alyp, áleýmettik jelilerde jarııalaıdy. Al jeńimpazdar daýys berý arqyly anyqtalady. Baıqaý sońynda olar óz jobalaryn iske asyrýǵa basshylyq jasaıtyn bolady.
Baıqaý 2017 jyly 1 naýryz ben 1 sáýir aralyǵynda kelesi taqyryptar boıynsha ótkiziledi:
1. QR Prezıdentiniń joldaýyn qala xalqyna túsindirý boıynsha úzdik joba;
2. Qoǵamdyq kólikterdiń jumysyn uıymdastyrý;
3. Shymkent qalasy týraly úzdik beınerolık;
4. Shymkent qalasyndaǵy parkterdi, shatqaldar men jaǵalaýlardy tıimdi paıdalanýdy uıymdastyrý;
5. Buqaralyq sportty uıymdastyrý boıynsha tıimdi joba.
