Stýdentter arasynda qumar oıynǵa salynǵandar kóp - depýtat
ASTANA. KAZINFORM – Qazir bás tigý salasynda jumys istep jatqan iri kompanııalarǵa qatysty qatań zań shyǵarylady. Bul týraly Parlament Májilisi janyndaǵy Qoǵamdyq palatanyń otyrysynda oıyn bıznesine arnalǵan zań jobasyn talqylaý kezinde depýtat Rýslan Berdenov aıtty.
«Qumar oıyn saldarynan qanshama adam sýıtsıdke baryp jatyr. Biraq onyń sebebin kóp jaǵdaıda bilmeımiz. Sonymen qatar, ajyrasýlardyń 40 paıyzyna osy lýdomanııa tikeleı sebep boldy. Mekteptegi oqýshylardyń arasynda da osy oıynnan habary bar. Bul máselege qatysty segiz ýnıversıtetke bardym. Joǵary oqý oryndarynda lýdomandar kóp ekeni, keıbir ýnıversıtetterde 30-40 paıyzǵa deıin jetetini aıtylyp jatyr. Er balalar da, qyzdar da oınap júr. Osy turǵyda oqý oryndarynyń basshylyǵy zańnamany qatańdatý máselesin kóterip otyr», - dedi R. Berdenov.
Onyń aıtýynsha, Májilis qaraýyndaǵy oıyn bıznesi, lotereıalar jáne lotereıa qyzmeti máseleleri jónindegi zań jobasy aıasynda zańnamany qatańdatý tetikteri qarastyrylǵan.
«Qazir jumys istep jatqan iri kompanııalarǵa qatysty qatań zań shyǵarý kerek. Oıynqumarlyq, bás tigý jaıynda aıtyp júrgende, kóp jaǵdaıda Satty Zhuldyz kompanııasy nazardan tys qalyp jatady. Bul kompanııa elimizde monopolıst sanalady. Osy kompanııa qyzmeti barlyq óńirdegi dúkenderde jáne nysandarda taralǵan. Tipti, dinı mekemelerde de bar eken. Keshe bir vıdeony kórdim, onda dinı mekemeniń ózine de qoıǵanyn baıqadyq», - dedi depýtat.
Rýslan Berdenov lotereıany jastar da, kárisi de oınaıtynyn aıtty.
«Bul rette, lotomatıkterdi aıtyp jatyrmyz. Jaqynda Týrızm jáne sport vıtse-mınıstri Mıras Tólebaevpen pikir almasyp, biraz jumys istedik. Qazaqstan boıynsha zańsyz jumys istegen 326 lotoklýb jabyldy. Alaıda zańdy túrde jumys istep turǵan lotoklýbtar bar. Onyń da jumysyn biz qarastyrýymyz kerek», - dedi depýtat.
Eske salsaq, jaqynda Parlament Májilisinde «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy tanystyryldy.
Elimizde 400 myńdaı adam býkmekerler men kazınolardyń turaqty klıentine aınalǵan.
