Stýdentter alkogoldi kúnde ishetinderin ashyq aıtyp otyr - «Aman-saýlyq» qory
ASTANA. QazAqparat - «Aman-saýlyq» qoǵamdyq qory stýdentterdiń densaýlyǵyna qaýip-qater tóndiretin faktorlardy anyqtaýǵa arnalǵan zertteýdi ótkizdi, dep xabarlaıdy QazAqparat tilshisi.
Saýalnama málimetterine sáıkes, stýdentterdiń basym bóligi árdaıym fast-fýd tutynady, sondyqtan taǵamnan jıi ýlanatyn jáne asqazan-ishek aýrýlaryna shaldyǵatyn topqa jatady. Máselen, saýalnamaǵa qatysqandardyń 74 paıyzy fast-fýd tutynady, olardyń 32 paıyzy kúnine bir nemese birneshe ret fast-fýdpen tamaqtanatynyn jetkizgen. Negizgi sebepteri - fast-fýdtyń dámi,sánge elikteý jáne ýaqytty únemdeý.
Gazdalǵan tátti sýsyndar men jemis shyryndaryn tutynýda da týra sondaı jaǵdaı baıqalyp otyr. Respondentterdiń 70 paıyzdan astamy qant mólsheri joǵary gazdalǵan sýsyndardy, energetıkterdi jáne shyryndardy ishetinderin moıyndady. Osy rette jartysynan kóbi ondaı sýsyndardy kúnine bir nemese birneshe ret turaqty túrde iship otyrady eken.
Stýdentterdiń 32 paıyzy alkogoldi ishimdikterdi de ishetinderin moıyndady, tipti 8 paıyzy ony kúndelikti ishetin kórinedi. Jalpy, saýalnamaǵa qatysqandardyń 11 paıyzǵa jýyǵy aptasyna bir nemese birneshe ret ishimdik ishetinin jetkizgen. Alkogoldi ishimdikterdiń basym bóligi sharap, syra sııaqty kúshtiligi ortasha ishimdik bolsa da, 20 paıyzy qatty alkogolge tıesili.
Osy tusta stýdentterdiń úshten biri shylym shegedi eken, olardyń 55 paıyzy kúnine bir nemese odan kóbirek temeki tartady. Buǵan qosa temeki shegetinderdiń 56 paıyzy elektrondyq temekini, 38 paıyzy kalıandy, al 20 paıyzy tyıym salynǵanyna qaramastan, nasybaıdy tutynady eken. Jalpy, stýdentterdiń 70 paıyzǵa jýyǵy belsendi ómir saltyn ustanamyn dep esepteıdi. Alaıda olardyń kópshiligi turaqty túrde sportpen shuǵyldanbaıdy. Stýdentterdiń úshten ekisinen astamynda ózderiniń densaýlyǵy týraly dál aqparat joq jáne de turaqty túrde medıtsınalyq qaralýdan ótpeıdi. Óz densaýlyǵyn turaqty túrde tekserip otyratyndyqtan, tek 31 paıyz stýdentte ǵana óz densaýlyǵy týraly salystyrmaly túrde dál aqparat bar.
"Jastar arasyndaǵy qaýip-qater faktorlaryn anyqtaý - salaýatty ómir saltyn qalyptastyrý baǵytynda jasalyp otyrǵan mańyzdy qadam. Ótkizilgen zertteýdiń arqasynda biz búgingi kúni stýdentterdiń kópshiligin densaýlyq máseleleri tolǵandyrmaıtynyn kórip otyrmyz. Olar ýaqytym joq degennen bastap, ómirdiń búkil qyzyǵyn kórsem degen sekildi myńdaǵan syltaýdy aıtýy múmkin. Alaıda ultymyzdyń saýlyǵyn saqtaý úshin qaýip-qater faktorlary týraly jastaıynan bilý qajet, sondyqtan memleket osy máselege jiti kóńil bólýi tıis", - deıdi «Aman-saýlyq» qorynyń prezıdenti Baqyt Túmenova.
Saýalnama 2016 jyldyń qazan-jeltoqsan aılary aralyǵynda uıymdastyryldy. Oǵan Almaty qalasyndaǵy joǵary oqý oryndarynyń 617 stýdenti, ıaǵnı óz úıinde, jataqhanada jáne jaldamaly páterlerde turyp jatqan jalpy stýdentterdiń shamamen 0,5 paıyzy qatysty.
QR Ulttyq ekonomıka mınıstrligi Statıstıka komıtetiniń málimetterine sáıkes, 2016-2017 oqý jylynda Almaty qalasyndaǵy joǵary oqý oryndarynda 130761 stýdent bilim alyp júr.
