Stýdentke kásip úıretken tálimgerge ústemeaqy tólenetin bolady
Bul týraly QR Parlamenti Májilisinde Bilim jáne ǵylym vıtse-mınıstri Bıbigúl Asylova málim etti, dep habarlaıdy QazAqparat.
Qazaqstanda dýaldy bilim berý baǵytynda barlyq qajetti jaǵdaılar jasalǵanyna toqtalǵan vıtse-mınıstr, búginde osy bilim berý júıesi 2-3 kýrstarda oqytý baǵdarlamasynyń óndiriste 60 paıyzǵa jýyq deńgeıin qurap otyrǵandyǵyn atap ótti.
«Qazirgi kezde bizde osy baǵdarlamamen 2 400 kásiporyn jumys istep jatyr, 440 kolledj dýaldy oqytýǵa jumyldyrylǵan. Mańyzdy máseleniń biri - ol dýaldy bilim berýdegi shyǵystardy qarjylandyrýǵa qatysty. Búginde Bilim jáne ǵylym mınıstrligimen tehnıkalyq jáne kásiptik bilim berý uıymdarynda jan basyna qarjylandyrý ádistemesi ázirlenýde. Atalǵan ádisteme aıasynda qanatqaqty rejimde pysyqtamaqpyz»,-dep toqtaldy B. Asylova «Nur Otan» partııasy saılaýaldy baǵdarlamasynyń «Bilim» baǵyty boıynsha komıssııasynyń «Tehnıkalyq jáne kásiptik bilim berý uıymdarynda dýaldy oqytýdy engizý» taqyrybyndaǵy otyrystyń barysynda.
Osy oraıda ol shyǵyndardyń negizinde tálimger ustazdyń eńbekaqysy eskerilgenin atap ótti. Atap aıtqanda, dýaldy oqytý úshin jumys oryndaryn qurý men tájirıbeni qamtamasyz etý kásiporynnyń ózine bekitilgen.
Vıtse-mınıstr júıe aıasynda bir stýdentti oqytýdyń shyǵystary ortasha eseppen alǵanda jylyna 360 myń teńge quraıtynyn aıta kele: «Nátıjeli jumyspen qamtý baǵdarlamasy boıynsha biliktilikti arttyrý kýrstarynda tálimger ustazdardyń eńbekaqysyn tóleýge shyǵystardy eskerdik. Osy oraıda qaıta daıarlaý kýrstarynda daıarlyqtan ótkizýge 44 myń teńge qarastyryldy. Óıtkeni kásiporynda jumys isteıtin adamǵa qosymsha júkteme túsetini belgili. Bul baǵytta tálimger ustaz stýdentti oqytýǵa óziniń ýaqytyn bólýi tıis bolady. Sondyqtan biz jumys berýshiler men tálimgerdi yntalandyrýǵa nıettimiz»,-dedi.
Osy rette tálimger ustazdyń eńbekaqysyna qosymsha 44 myń teńge qosylady. Nátıjeli jumyspen qamtý baǵdarlamasy aıasynda bul maqsatta memleket esebinen 70 mln. teńgege tarta qarjy qarastyrylǵan.
