Stýdent ólimine baılanysty QazUÝ-da prorektor men dekan jumysynan ketti
ALMATY. KAZINFORM – Ál-Farabı atyndaǵy QazUÝ stýdent ólimine baılanysty málimdeme jasady.
Ýnıversıtet baspasóz qyzmetiniń málimetinshe, qaıǵyly jaǵdaıǵa baılanysty JOO basshylyǵy tarapynan shuǵyl sharalar qabyldanǵan. Atap aıtqanda, jataqhanadaǵy qaýipsizdik pen tártipti tıisti deńgeıde qamtamasyz ete almaǵany úshin Basqarma múshesi – áleýmettik turaqty damý jónindegi prorektor, sondaı-aq geografııa jáne tabıǵatty paıdalaný fakýltetiniń dekany laýazymdarynan bosatylǵan.
Odan bólek jataqhanada sol kúni kezekshilikte bolǵan jaýapty qyzmetkerler jumystan shettetilgen. Qazir olardyń áreketterine quqyqtyq baǵa berilip jatyr.
- Bolǵan oqıǵa – ýnıversıtet qaýymy úshin orny tolmas aýyr qaıǵy. Stýdentimizdiń qazasy qabyrǵamyzdy qaıystyrdy. Ýnıversıtet otbasymen baılanysta jáne qajetti qoldaý kórsetýge árdaıym daıyn, - dep habarlady ýnıversıtetten.
Sondaı-aq qazir barlyq jataqhanalarda keshki baqylaý kúsheıtilip, stýdentterdiń qaýipsizdigin qamtamasyz etý jáne kásibı psıhologııalyq kómek kórsetý boıynsha qosymsha sharalar engizilgeni atap ótildi.
Ál-Farabı atyndaǵy QazUÝ bul oqıǵaǵa qatysty eshqandaı derekti jasyrmaıtynyn, quqyq qorǵaý organdary júrgizip jatqan tergeýge kómek kórsetip jatqanyn jáne istiń ádil, ashyq ótýine tikeleı múddeli ekenin málimdedi.
Eske salaıyq, keshe Ál-Farabı atyndaǵy Qazaq ulttyq ýnıversıtetiniń geografııa jáne tabıǵatty paıdalaný fakýltetinde oqyǵan birinshi kýrs stýdenti mert bolǵany belgili boldy.