Stýdent ólimine qatysty aıyptalýshy kinəsin moıyndamady
ALMATY. QazAqparat - Búgin QazUAÝ stýdenti Dıdar Bolysbektiń qazasyna qatysty sot protsesinde sottalýshy Toıshybek Asamov bolǵan oqıǵanyń mán-jaıyn baıandap berdi, dep habarlaıdy QazAqparat tilshisi sot zalynan.
Sottalýshy óziniń Dıdardy urmaǵanyn jetkizdi.
«Maǵan taǵylǵan aıypty moıyndamaımyn. Óıtkeni, men ony urǵan joqpyn, ony oıatýǵa tyrystym. Ol kúni uıqyda bolatynmyn. Tún ishinde meni bireý julqylap oıatty. Bári 1-kýrstaǵy Kamal degen balanyń qarsylyq bildirgeninen bastalǵan bolyp shyqty. Dosboldyń bólmesinde Dıdardy Dosbol tizesimen eki ret soqty. Sosyn Dıdar jambasymen qulady. Birden bildim, tili ketip bara jatqanyn. Júgirip baryp Dıdar «oıan, oıan» dep shapalaqtaı bastadym. Maqsat aýzyn ashýǵa tyrysty. Maqsattyń qolyn tistep aldy. Qasyq kerek degen soń qasyqty berdim. Birden 230 bólmege bardyq. 2-kýrs stýdenti Baýyrjan men Samǵat tapanshany jasyr, áıtpese basymyzǵa bále bolady dep jatty. Kýrstasymyz Erlan Japar: «1 kýrstarǵa baspaldaqtan qulap ketti, sodan soń bólmege apardyq dep aıtamyz. Bárimizdiń sózimiz bir jerden shyqsyn» dedi. Sodan jedel járdem keldi. Al, bizdi ishki ister bólimine alyp keldi. Erlan bir polıtsııa qyzmetkerimen syrtqa shyǵyp, jeke sóılesken soń «myna qylmysty bireýimiz moınymyzǵa alýymyz kerek eken. Toıshybek sen al, 2 kúnnen keıin shyǵaryp alamyz», dedi. Men qarsy boldym. Sonda da basyma qapshyq kıgizip tunshyqtyrdy, bári jabylyp urdy», - dedi Toıshybek Asamov.
Onyń aıtýynsha, 1-kýrs stýdentterin qorqytyp aqsha bopsalaýmen basqalar aınalysqan. Baýyrjan Nesipbaı esimdi stýdent tapansha, Jaqsylyqov Samǵat pyshaq arqyly 1 kýrs stýdentterin qorqytyp ustaǵan.
Asamovtyń qorǵaýshysy Toıbek Joldasov is materıaldaryna tirkelgen №806 sot-medıtsınalyq saraptamasynyń shynaıylyǵyna kúmán keltirip, marqumnyń denesin qaıta qazyp alyp qosymsha taǵaıyndaýdy surady. Sondaı-aq, oqıǵa bolǵan jerdegi hattamanyń obektıvtiligine shúbálanyp, oqıǵa bolǵan jerdi qaıta qarap shyǵýǵa ótinim bildirdi.
Alaıda sot qorǵaýshynyń ótinimderin qanaǵattandyrmady.
Aıta keteıik, qaıǵyly oqıǵa 12 sáýirde QazUAÝ jataqhanasynda bolǵan edi. Birinshi jáne ekinshi kýrsta oqıtyn 10-nan astam stýdent jataqhanada tóbelesip, sonyń saldarynan 17 jastaǵy Dıdar Bolysbek qaza bolǵan edi. Keıinirek polıtsııa atalǵan oqý ornynyń 2-kýrsynda oqıtyn 2 stýdentti ustady. Sot aldynda olardyń bireýi ǵana - Toıshybek Asamov jaýap berýde. Oǵan QR QK 106-babynyń 3-bóligi (adam densaýlyǵyna qasaqana aýyr nuqsan keltirý), QR QK 194-babynyń 1-bóligi (kúshtep múlkin tartyp alý) boıynsha aıyp taǵylyp otyr.
