Stýdent qyzdy azaptap óltirgen taksı júrgizýshisi 20 jylǵa sottaldy
Ońtústik Qazaqstan oblysynyń Qylmystyq ister jónindegi mamandandyrylǵan aýdanaralyq soty osy jyldyń qyrkúıek aıynda Álisher Arǵynbaevqa qatysty 16 jylǵa bas bostandyǵynan aıyrǵan bolatyn. Alaıda, mundaı úkimmen qadaǵalaý organy ókilderi de, marqumnyń týystary da kelispegen edi. Oblystyq prokýratýra tarapynan keltirilgen narazylyqtan keıin qylmystyq is oblystyq sottyń apellıatsııalyq alqasynda qaraldy. Sóıtip boıjetkendi azaptap óltirgen júrgizýshige qatysty jańa aıyptaý úkimi qabyldandy.
Apellıatsııalyq sot alqasy Álisher Arǵynbaevty jasy kámeletke tolmaǵan jábirlenýshi Ospanbekovaǵa qaraqshylyq jasap, odan keıin ony asa qatygezdikpen óltirgeni úshin Qazaqstan Respýblıkasy Qylmystyq Kodeksiniń 99 babymen jáne 192-babynyń 2-bóligi 4-tarmaǵymen kináli dep tanydy. Oǵan jeke múlkin tárkileı otyryp túpkilikti 20 jyl merzimge bas bostandyǵynan aıyrý jazasy taǵaıyndaldy. Jazany qatań rejimdegi túzeý kolonııasynda óteý belgilendi.
Esterińizge sala ketsek, osy jyldyń mamyr aıynda Saryaǵashtan Shymkenttegi oqýyna shyqqan Áıgerim Ospanbekova eki aptadan keıin óli kúıinde tabylǵan bolatyn. Keıinnen ony 25 jastaǵy taksı júrgizýshisi óltirgeni anyqtalyp, ustalǵan bolatyn.