Stýdent iPhone 6-ny satyp alý úshin sóz baılasqan qyzyn aqshaǵa jalǵa bergen
ASTANA. QazAqparat - Apple kompanııasy jýyrda tanystyrǵan iPhone 6 smartfonyn satyp alýǵa aqshasy jetpegen qytaılyq stýdent sóz baılasqan qyzyn jalǵa bergen. «Klıentterden» ol saǵatyna 10 ıýannan (300 teńge kóleminde), aıyna 500 ıýanǵa (15 myń teńge) deıin alyp otyrǵan. Óz qyzyn jarnamalap júrgen fotosy qytaılyq Weibo áleýmettik jelisine keńinen taralyp ketti.
Aqsha jınaýdyń erekshe tásilin qoldanǵan stýdenttiń esimin atamaı South China Morning Post jazdy. Basylym jarııalaǵan fotosýretteriniń birinde jas jigit qyzmet quny jazylǵan plakatpen kórsetilgen.
Ekinshi túsirilimde qyz kórinip tur, alaıda beti búrkemelengen. Táýekelshil qytaılyq qyzdyń sýretin óz usynysy qyzyqtyrǵan adamdarǵa kórsetken. Al qyz onyń aqsha jınaýy úshin bul qadamǵa óz erkimen kelisken. Qyz týraly kóp eshteńe jazylmaǵan.
Aqsha tólep, qyzben túski as ishýge, oıyn oınaýǵa, kezdesýge barýǵa bolady. Stýdent ıntımǵa jol berilmeıtinin aıtqan. Al qyz ben jigit qashannan beri kezdesip júrgenderi jaıynda, sonymen birge qansha aqsha jınalǵany týraly aıtylmaǵan.
Mundaı qyzmetter Qytaıda ózekti bolýy ábden múmkin. Óıtkeni elde názik jandylarǵa qaraǵanda er adamdar óte kóp. Mıllıondaǵan er adam úılene almaýy múmkin. Buǵan «bir otbasy - bir bala» saıasaty áser etken. Ár januıada bir ǵana bala bolýy kerek degen talapty oryndaý kezinde ár shańyraq tek ul balany dúnıege ákelgen, kóbi qyz bolǵan jaǵdaıda aldyryp tastap otyrǵan. Sonyń áserinen elde er adam sany artyp, boıdaqtar kúrt kóbeıgen.
Qytaıda 11 qarashada Jalǵyzdyq kúni atap ótiledi.
