Stýdent eki aıaǵynan aıyrylǵan jol apaty: Arys ákiminiń ulyna qatysty qylmystyq is toqtatyldy
TÚRKІSTAN. KAZINFORM — Astana-Pavlodar tasjolynda 20 jastaǵy stýdent Talǵat Emeldiń eki aıaǵynan aıyrylýyna ákelgen jol apatyna qatysty qylmystyq is toqtatyldy. Kólik tizgininde Arys qalasynyń ákimi Qaısar Mańqaraevtyń uly bolǵan.
Jol apaty 2026 jylǵy 29 mamyrda bolǵan. Kólik jol jıegindegi temir qorshaýǵa soǵylyp, qorshaý kóliktiń salonyn tesip ótken. Apat saldarynan Talǵat Emel aýyr jaraqattanyp, dárigerler onyń eki aıaǵyn ampýtatsııalaýǵa májbúr bolǵan.
Oqıǵa boıynsha Ekibastuz qalasynyń polıtsııasy jol júrisi qaǵıdalaryn buzyp, abaısyzda adam densaýlyǵyna aýyr zııan keltirý faktisi boıynsha Qylmystyq kodekstiń 345-babynyń 2-bóligine sáıkes qylmystyq is qozǵaǵan edi.
Pavlodar oblysy polıtsııa departamentiniń málimetinshe, qylmystyq is raqymshylyq týraly zańnyń negizinde toqtatylǵan.
— Bıylǵy jyldyń 16 qyrkúıeginde jol-kólik oqıǵasy deregi boıynsha qylmystyq is Qazaqstan Respýblıkasynyń 2026 jylǵy 1 shildedegi raqymshylyq jasaý týraly zańnyń negizinde toqtatylyp, bekitý úshin Ekibastuz qalasynyń prokýratýrasyna joldandy. Sonymen qatar, zardap shekkenderge azamattyq tártippen sotqa júginý usynyldy, — delingen polıtsııa habarlamasynda.
Buǵan deıin Arys qalasynyń ákimi Qaısar Mańqaraev kólikti óziniń uly basqarǵanyn rastaǵan edi. Ol ulynyń kámeletke tolǵan azamat ekenin jáne Qazaqstan Respýblıkasynyń zańnamasyna sáıkes óz áreketteri úshin jeke jaýapkershilikke ıe ekenin atap ótti. Sondaı-aq ákim óziniń qyzmettik ókilettigin paıdalanbaıtynyn jáne tergeý barysyna yqpal etýge tyryspaıtynyn málimdegen.
— Zań aldynda barlyǵy teń. Bul qaǵıdat meniń otbasy múshelerime de tolyq qoldanylady. Oqıǵanyń barlyq mán-jaıyna obektıvti quqyqtyq baǵa beriledi. Al túpkilikti sheshimdi zańda belgilengen tártippen quzyretti memlekettik organdar qabyldaıdy, — dedi Qaısar Mańqaraev.
Buǵan deıin Astana-Pavlodar tasjolyndaǵy jol apatynan jas jigittiń eki aıaǵynan aıyrylǵanyn habarlaǵan edik.
