Stýdent bıýdjet qarajatyna oqyǵan kezeńin ǵana eńbekpen óteıdi
NUR-SULTAN. QazAqparat – Stýdent bıýdjet qarajatynan qansha jyl oqysa, tek sol kezeńdi eńbekpen óteıdi. Bul týraly tıisti zań jobasyn talqylaý kezinde Májilis depýtaty Ábdimanap Bekturǵanov málim etti, dep habarlaıdy QazAqparat tilshisi.
«Qoldanystaǵy zańǵa sáıkes, memlekettik tapsyrys boıynsha bilim alǵan túlekter, ıaǵnı medıtsınalyq ári pedagogıkalyq mamandyqtar aıasynda oqýdy bitirgennen keıin olar úsh jyl jumyspen óteýi kerek. Grantpen oqýǵa túsip, osy grantpen oqýdy aıaqtaǵan túlekterge qatysty eshqandaı suraqtar joq. Al eger alǵashqy kezde grantpen oqýǵa túsip, keıin aqyly negizge aýysatyn bolsa nemese aqyly negizden grantqa aýyssa, bul turǵyda tıisti suraqtar bar», - dedi depýtat Májilistiń jalpy otyrysynda.
Mysaly, stýdent alǵashqyda grantqa oqý túsip, sońǵy kýrsta aqyly negizge aýysady. Ol aqyly negizde oqýdy támamdaǵannan keıin, túlekter ekbekpen óteýmen qamtylmaıdy.
«Sonymen qatar, aqyly negizde oqyp, oqý úlgerimi jaqsy stýdentter úshinshi kýrsta grantqa aýysyp jatady. Olar oqýdy grant esebinen bitirgennen keıin, bul stýdentter úsh jyl jumyspen óteýge tıisti bolady. Osyǵan baılanysty memlekettik tapsyrys kezinde bıýdjet qarajatynan qansha jyl oqysa, tek sol kezeńdi eńbekpen óteıdi», - dep túsindirdi Á. Bekturǵanov.
Budan buryn habarlanǵandaı, Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Aıta keteıik, joǵary oqý ornyn bitirýshiniń memlekettik bilim berý tapsyrysynda oqý uzaqtyǵyna proportsıonaldy túrde eńbekpen óteý merzimin belgileý arqyly sheshý usynylady. Osylaısha, memlekettik bilim berý tapsyrysynda bilim alǵan azamattar búkil kezeńde – barlyq úsh jyldy da jumyspen óteıtin bolady. Al bilim alýshylar ishinara, ıaǵnı bir bóligin aqyly negizde – memlekettik bıýdjet esebinen oqý kezeńine mólsherles óteıtin bolady.
