Stsenarııin áıel jazǵan fılmder kóp tabys ákeledi — zertteý
ASTANA. KAZINFORM — Maınts ýnıversıtetiniń zertteýshisi Anıa Hývıler sońǵy 30 jylda túsirilgen 200 myńǵa jýyq fılmniń derekterin taldap, osyndaı qorytyndyǵa kelgen, dep habarlaıdy DW.
Hývılerdiń esepteýinshe, stsenarııin jazýǵa keminde bir áıel qatysqan, al rejısseri er adam bolǵan fılmder eń joǵary tabys ákelgen. Olardyń medıanalyq tabysy shamamen 35,9 mln dollar. Bul stsenarıı avtorlary da, rejısserleri de tek er adamdar bolǵan fılmderdiń kórsetkishinen 34%-ǵa joǵary. Sońǵylarynyń medıanalyq tabysy shamamen 26,8 mln dollar bolǵan.
Sonymen qatar kınoındýstrııadaǵy eń iri bıýdjetterdi áli de negizinen er adamdar alady. Zertteýge engen eń qymbat 44 fılmniń barlyǵyn er adamdar rejısserlik etken. Onyń 39-ynda stsenarıı avtorlarynyń arasynda da tek er adamdar bolǵan.
Zertteý kınoındýstrııadaǵy genderlik teńdik týraly kópjyldyq pikirtalastarǵa qaramastan, stsenarıst nemese rejısser sııaqty negizgi rólderdiń keminde birin áıel atqaratyn fılmderdiń úlesi 1994 jylǵy 21,5%-dan 2023 jyly nebári 29,4%-ǵa óskenin kórsetti.
Hývılerdiń aıtýynsha, zertteý máseleni tek genderlik teńdik turǵysynan emes, bıznes turǵysynan da qarastyrady.
— Stýdııalar men ınvestorlar úshin ınvestıtsııalyq sheshimderiniń ózderi baıqaǵan qarjylyq nátıjelerge qanshalyqty sáıkes keletini mańyzdy. Zertteý nátıjelerim kadrlardy irikteý, jobalardy maquldaý jáne bıýdjetterdi bólý kezinde qalyptasqan tájirıbelerdi qaıta qaraýǵa negiz beredi, — deıdi zertteýshi.
Aıta keteıik, brıtandyq zertteýshiler sońǵy onjyldyqta Anglııada jaqyn dostary joq jastar sany bes ese óskenin málimdedi.
