"STS-Medıa" qazaqstandyq keńistikti óziniń aqparattyq otaryna aınaldyrǵysy keledi - baspasóz máslıhaty
ALMATY. Mamyrdyń 5-i. QazAqparat /Názıra Eleýhan/ - 31 telearnanyń basqarýshy kompanııasy "STS-Medıa" Qazaqstan Respýblıkasynyń "Tilder týraly" zańynyń normalaryn óreskel buzyp otyr. Bul týraly búgin Almatyda arnaıy ótken baspasóz máslıhatynda 31 telearnadan óz erikterimen jumystan ketken bir top tilshiler málimdedi,
dep habarlaıdy QazAqparat.
Olardyń aıtýynsha, «31 telearnanyń» 20 paıyz aktsııasyn Reseılik «STS-Medıa» holdıngi satyp alǵannan beri, arnada «tótenshe jaǵdaılar» qalyptasqan. «Birinshiden, «STS-Medıa» jańa jyldan beri qazaq tilinde shyǵyp kelgen 5 habardy, oǵan deıin de 2-3 jyl ishinde ondaǵan habardy túrli sebeptermen, tipti sebepsiz de japty. Efırlik saıasatty reseılik aqparattyq ekspansııa jaǵdaıynda ustap otyr. Olar quryltaıshylyq aktsııanyń az ǵana bóligin ıelenip otyrǵanyna qaramastan, arnanyń uıymdastyrý, shyǵarmashylyq jumystardyń sheshimin Máskeýge táýeldi etip qoıdy. Ekinshiden, qazaq jýrnalısterin jalshylyq jaǵdaıda ustaýda. Qazaq tildi jýrnalıster dekoratsııany ózderi jasap, qara jumystardy da atqarady. Sonymen qatar, olar jyldyń basynda jabylǵan habarlardyń ornyna ýáde berip shyǵarǵan eki jobany da toqtatyp tastady. Bul jobany jasaǵan jýrnalısterdi 3 aı aqysyz jumys isteýge májbúrledi. Olar qazaqstandyq keńistikti óziniń aqparattyq otaryna aınaldyrǵysy keledi. Biz 14 jýrnalıst, osy sebeptermen óz erkimizben jumystan kettik», dedi 31 telearnanyń burynǵy qyzmetkeri Qanat Tileýhan. Onyń aıtýynsha, qazaq tilindegi habarlar «reıtıngtik úlesi tómen» degen syltaýmen jabylǵan.
Baspasóz máslıhatyna qatysqan jýrnalıst Ulpan Quraısovanyń aıtýynsha, qazaq tilindegi habarlar suranysqa ıe. «Onyń kórermenderi kóp. Menińshe, barlyq másele habarlarǵa zertteý, monıtorıng júrgizetin Gallup medıada, biz onyń respondentterin kim ekenin bilmeımiz, reıtıngti qalaı qurastyratyndary da beımálim», dep atap ótti ol.
