Strımıngtik platforma derekti fılm óndirisine qulyqsyz – rejısser Rınat Balǵabaev
ASTANA. KAZINFORM – Elimizge belgili rejısser Rınat Balǵabaev derekti fılmder arqyly kóptegen áleýmettik máseleni kóterip keledi. Onyń týyndylary qoǵam arasynda keń taralyp, keı zańnamanyń ózgerýine ákelip soqty. Jaqynda avtor kórermendermen kezdesý ótkizgen bolatyn.
Qazaqstandyq rejısser turmystyq zorlyq-zombylyq, depressııa, lýdomanııa, esirtki saýdasy taqyryptaryna arnalǵan derekti fılmderimen tanymal. Onyń «Begı», «Oderjımost», «Gorgona», «Zatmenıe» týyndylary áleýmettik jelide kóp qaralym jınap, qoǵam talap etken quqyqtyq ózgeristerge bastady.
– Derekti fılmder jaryq kórgennen keıin bılik tarapynan qozǵalys boldy. Mysaly, Qylmystyq kodekste «jynystyq bopsalaý» termıni paıda boldy. Oǵan deıin jynystyq bopsalaý jasaǵandar kóbine ákimshilik jazamen qutylatyn, – dedi Rınat Balǵabaev.
Rejısserdiń sózinshe, onyń derekti fılmi áser etken salanyń biri – esirtki saýdasy. «Zakladka» atty fılminen keıin ózge avtorlar atalǵan taqyrypta tórt týyndy túsirgen. Nátıjesinde esirtki saýdasyna qatysty qylmystardyń jaza merzimine ózgeris endi.
Qazir otandyq derekti fılmderdiń deni tek áleýmettik jelilerde bar. Aýqymdy strımıngtik platformalarda derekti fılmder tizbegin tabý qıyn. Rınat Balǵabaev mundaı úrdistiń sebebi suranystyń azdyǵyna baılanysty degen oı aıtty.
– Qazaqstanda sheteldik jáne otandyq strımıngtik platformalar jetkilikti. Olardyń qatary jyl sanap artyp keledi. Alaıda platformalarda derekti fılm kóbeımeı otyr. Sebebi strımıngtik platformalar daıyn ónimdi qalaıdy, kontent óndirisine qarjy quıǵysy joq. Onyń ústine eksklıýzıvti kontent bolǵanyn talap etedi, demek ózge áleýmettik jelilerde jarııalanbaýy kerek. Osy naryq erejesi salanyń damýyna tejeý bolýda, – dedi avtor.
Aıta keteıik, buǵan deıin Marwin/Meloman dúkenderi jelisinde ótip jatqan «BOOKFEST-2025» festıvalinde tarıhshy Jaqsylyq Sábıtov Altyn Orda tarıhy týraly oı bólisken edi.
Sondaı-aq qalamger Baıanǵalı Álimjanovtyń balalarǵa arnalǵan «400 tátti taqpaq» atty taqpaqtar jınaǵynyń tanystyrylymy ótti.