Strım arqyly saýda jasaıtyndarǵa da salyq eskertýi jiberiledi — departament dırektory
ASTANA. KAZINFORM — Áleýmettik jelilerde tikeleı efır, ıaǵnı strım arqyly taýar satatyn nemese onlaın-saýdamen aınalysatyn azamattar da salyq organdarynyń monıtorıngine ilinedi. Tikeleı efırde satýdan tabys tapqan satýshylarǵa 3 aı boıy 100 túrli adamnan mobıldi aýdarym túsken jaǵdaıda arnaıy habarlama jiberiledi. Bul týraly BIZDIÑ ORTA podkastynda Óndiristik emes tólemderdi jáne jeke tolyqtyrýlardy ákimshilendirý departamentiniń dırektory Shyndalı Zańǵar málimdedi.
Búgingi tańda áleýmettik jeliler arqyly taýar usynyp, aqshany jeke mobıldi aýdarymmen qabyldaý keń taraǵan. Alaıda salyq zańnamasyna sáıkes, bul áreket kásipkerlik qyzmet bolyp sanalady jáne arnaıy tirkeýdi talap etedi.
— Strım arqyly satý kezinde tabys tapsa, mindetti túrde tirkelý kerek jáne salyq tóleý qajet. Bul jerde de bekitilgen ólshemsharttar jumys isteıdi. Eger onlaın-satýshylarǵa 3 aı boıy 100 túrli adamnan aýdarym tússe, olarǵa da habarlama keledi. Bul salyq túsimin kóbeıtý úshin ǵana emes, bıznestiń adal ári ádil ortada jumys isteýin qamtamasyz etý úshin jasalyp jatyr, — dedi Zulyphar Shyndalı.
Spıkerdiń aıtýynsha, zańsyz jumys isteıtin satýshylar men adal kásipkerler arasynda básekelestik teńsizdigi týyndaıdy. Salyqtan jaltaryp júrgenderde arnaıy shyǵyndar bolmaǵandyqtan, bul adal bızneske kedergi keltiredi. Salyq organdarynyń basty mindeti — barlyq naryq qatysýshylaryna birdeı jaǵdaı jasaý.
Sonymen qatar Departament ókili baqylaý sharalary bastalǵannan keıin baıqalǵan qolma-qol aqshaǵa qaıta ótý betalysyna qatysty pikir bildirdi.
— Qolma-qol aqshanyń ýaqytsha ósýi qysqa merzimdi sıpatqa ıe. Salyqtyq habarlamalar jiberilgen kezde qolma-qol aqsha suraý jaǵdaılary kóbeıip, keıin qaıta túsip jatady. Alaıda uzaq merzimdi perspektıvada qolma-qol aqsha kólemi báribir tómendeıdi. Sebebi satyp alýshylar ózderine yńǵaıly tólem túrin — mobıldi aýdarymdy, QR-kodty nemese onlaın tólemdi talap etedi. Qolma-qol aqshamen eseptesý satýshynyń ózine de yńǵaısyz, — dep atap ótti spıker.
Aıta keteıik, buǵan deıin, zańǵy qaıshy kontent taratqan 9 strımer jaýapqa tartyldy.
