Street Workout KZ: Gennadıı Golovkın Aıbek Nuǵymarovtan shaqyrý aldy
ASTANA. QazAqparat - Mádenıet jáne sport mınıstri Arystanbek Muhamedıulynyń «Street Workout KZ» saıysyn qoldaýǵa baǵyttalǵan bastamasyn «Qazaqstan Barysy» Aıbek Nuǵymarov ilip áketip, kásipqoı boksshy Gennadıı Golovkınge joldady, dep habarlaıdy QazAqparat tilshisi.
«Challenge Street Workout KZ» baıqaýyn qoldaýǵa bul joly alǵash ret qyzdar da qatysty. Ol taldyqorǵandyq Azııa chempıony jáne sambodan álem chempıonatynyń kúmis júldegeri - Dınara Jumabaeva.
«Men dzıýdo jáne sambo kúresinen 4 jasymnan bastap shuǵyldana bastadym. Bala kezimde meni bıleýge májbúrledi, biraq men ony unatpaı, aqyrynda qyzdar ózderin qorǵaıtyndaı kúshti bolýy kerek dep osy sportqa aýystym», - deıdi Dınara.
«Street Workout» alańy dál búgin eki saǵat boıy keremet shoýǵa aınaldy. Alańda biri soqqysynyń qanshalyqty myqty ekenin kórsetip jatsa, biri shtanga kóterip, denelerin týrnıkte birneshe ret kóterip, túrli ádisterdi kórsetti. Qatysýshylar arasynda balalar, jastar jáne eresek jastaǵy sportshylarda boldy. Barlyǵy bir týrnıkten, ekinshi týrnıkke ótip árqaısysy ózinshe týrnıkterde sheberlikterin kórsetýge tyrysty.
«Challenge Street Workout KZ» baıqaýynyń aýqymy kún saıyn artyp keledi. Osy sándi jáne paıdaly jobaǵa Qazaqstannyń kópshilikke tanymal tulǵalary da qatysyp, óz múmkindikterin kórsetýde.
«Men estafetany MMA qaýymdastyǵynyń vıtse-prezıdenti Anatolıı Kım men grek-rım, frıstaıl jáne áıelder kúresi federatsııasynyń vıtse-prezıdenti Erlan Qojasbaıǵa joldaımyn», - dedi Ulttyq komandalar men sport rezervteri dırektsııasynyń dırektory Samat Erǵalıev.
Erǵalıev joldamasyn aıaqtaı salysymen, sóz kezegin «Qazaqstan Barysy» Aıbek Nuǵymarov ilip áketti.
«Men Mádenıet jáne sport mınıstri Arystanbek Muhamedıulynyń joldamasyn qabyldap, ony Gennadıı Golovkınge, sondaı-aq MýzArt tobynyń ánshisi Sáken Maıǵazıevke joldaımyn», - dedi Qazaqstan barysy.
Eske sala ketsek, «Street Workout KZ» aktsııasyn QR Mádenıet jáne sport mınıstri Arystanbek Muhamedıuly bastap bergen bolatyn. Arystanbek Muhamedıuly jobany ózi bastap, «Street Workout KZ» baıqaýyn - Olımpıada chempıony Serik Sápıevke, tanymal ánshi Qaırat Nurtasqa, tanymal qazaqstandyq akter Ádil Ahmetovqa joldaǵan edi.
Al budan keıin boksshy Baqtııar Artaev pen taekvondoshy Arman Chılmanov QR Mádenıet jáne sport mınıstri Arystanbek Muhamedıulynyń Street workout KZ boıynsha bastamasyna qosyldy. Aktsııany keıin Atyraý oblystyq dene shynyqtyrý jáne sport basqarmasynyń basshysy Azamat Beket Beıjiń Olımpıada oıyndarynyń taekvandodan qola júldegeri Arman Chılmanovtan estafetany qabyldap, Sochı Olımpıada oıyndarynyń qola júldegeri mánerlep syrǵanaýshy Denıs Ten jáne bokstan álem chempıony Galıb Djafarovpen birge beıne-úndeý túsirgen. Rolıkte sportshylar barlyq qazaqstandyqtardy street workout-pen aınalysýǵa shaqyrdy.
Budan keıin Kásipqoı boksshy Qanat Islam Street Workout KZ is-sharasyna qatysqan QR Mádenıet jáne sport mınıstri Arystanbek Muhamedıulynyń bastamasyn qoldaǵan edi. Boksshy estafetany Azamat Beket pen Denıs Tennen qabyldap alǵan bolatyn.
