Street workout KZ: Baqtııar Artaev estafetany kimge joldady
ASTANA. QazAqparat - Afıny Olımpıadasynyń chempıony Baqtııar Artaev Street Workout boıynsha estafetany qabyl aldy, dep habarlaıdy QazAqparat tilshisi.
«Osyndaı sporttyq sharaǵa bastamashylyq jasaǵan Mádenıet jáne sport mınıstrine rızashylyǵymdy bildiremin. Sport - bul ult saýlyǵy. Al ult saýlyǵy básekege qabilettilikti bildiredi. Sportpen aınalysatyn kóp eldiń ekonomıkasy da myqty bolady. Sondyqtan barlyǵymyzdy myqty bolý úshin sportpen aınalysýǵa shaqyramyn», -dedi Baqtııar Artaev elordanyń úshsaıys saıabaǵynda beltemirge tartylyp, estafetany qabyldaǵannan keıin.
Dańqty boksshy estafetany «Jigitter» tobynyń ánshisi Baǵlan Ábdiraıymovqa berdi.
«Jańbyrly aýa raıyna qaramastan mundaı sharany jalǵastyrýymyz jastarǵa úlgi bolar dep oılaımyn. Tipti, qar jaýyp tursa da sportpen aınalysar edik. Al estafetany dosym Baǵlan Ábdiraıymqovqa beremin», - dedi ol.
Sharaǵa taekvondodan Beıjiń Olımpıadasynyń kúmis júldegeri Arman Shilmanov pen bokstan Azııa oıyndarynyń chempıony Іlııas Súleımenov te qatysty.
Eske sala ketsek, «Street Workout KZ» aktsııasyn kúni keshe ǵana QR Mádenıet jáne sport mınıstri Arystanbek Muhamedıuly bastap bergen bolatyn.
Arystanbek Muhamedıuly jobany ózi bastap, «Street Workout KZ» baıqaýyn - Olımpıada chempıony Serik Sápıevke, tanymal ánshi Qaırat Nurtasqa, tanymal qazaqstandyq akter Ádil Ahmetovke joldaǵan edi. Jobanyń negizgi syılyǵy - konkýrstyń jeńimpazy atanǵan aımaq Street Workout-pen aınalysý úshin jańa alańǵa ıe bolady. Ol úshin baıqaýdyń sharttaryn oryndaý qajet. Sharttary da óte qarapaıym, qazaqstandyqtar jattyǵý barysyndaǵy vıdeolaryn jelide bólisse jetkilikti. Baıqaý jaıly tolyǵyraq Challenge Street Workout KZ veb-saıtynan bilýge bolady.
«Baıqaýǵa qatysyp júldeli bolýǵa asyǵyńyz! Ony Street Workout-tyń arnaıy alańynda jasaý mindetti emes, kez kelgen jerden ózińizdiń beınelerińizdi túsirip, ózińizge yńǵaıly alańnan bizge joldańyz! Beınejazbany telefon kamerasyna da túsirýge bolady. Konkýrs 10 maýsymǵa deıin ótkiziledi, 15 maýsym kúni qorytyndysy jarııalanady. Sonymen qatar, beınetaspany «Challenge Street Workout KZ» jobasynyń saıtynda ornalastyrýǵa bolady», - dedi mınıstrliktiń baspasóz qyzmetinen.
