Strategy2050.kz jýrnalısi «Úrker-2020» syılyǵyn jeńip aldy

NUR-SULTAN. QazAqparat – Strategy2050.kz portalynyń bas redaktory Qaırat Jandybaev «Úrker-2020» syılyǵyn jeńip aldy, dep habarlaıdy QazAqparat tilshisi.

Jýrnalıst baspa, radıo jáne ınternet-jýrnalıstıka salasyndaǵy ulttyq syılyqtyń «Jyldyń úzdik analıtıkalyq materıaly» atalymynda ozyp shyqty. Bul atalymda Nurlan Orazǵalıev («Aıqyn» gazeti), Esimjan Naqtybaıuly (Inbusiness.kz portaly) jáne Gúlim Erkinbek (BariBar.kz portaly) úmitker bolǵan edi.

Jeńimpazǵa «Úrker» estelik músinshesi jáne bir mıllıon teńge aqshalaı syılyq tabys etildi.

Aıta keteıik, bıylǵy baıqaýdyń 11 nomınatsııasy boıynsha qatysýshylardan 470 ótinim kelip tústi. Ótinimder 2020 jyldyń 2 qazany men 5 qarashasy aralyǵynda qabyldandy.