Strategııalyq josparlaý agenttigi onlaın sanaq ótetin ýaqytty jarııalady

NUR-SULTAN. QazAqparat - Táýelsiz Qazaqstannyń tarıhyndaǵy úshinshi ulttyq sanaq 2019 jyly ótkiziledi dep josparlanǵanymen, 2021 jyly ótedi. Onlaın sanaq 2021 jyldyń 1 qyrkúıek pen 15 qazan aıynda Sanaq.gov.kz saıtynda ótkiziledi. Bul týraly Strategııalyq josparlaý jáne reformalar agenttigi «QazAqparat» agenttiginiń saýalyna jaýap retinde habarlady.

Sanaqqa daıyndaý jáne ony ótkizýmen QR Premer mınıstriniń birinshi orynbasary Álıhan Smaıylov basqaratyn Arnaıy komıssııa aınalysady.

2018-2023 jyldar aralyǵynda ulttyq sanaqty qarjylandyrýǵa qajetti soma — 9,1 mlrd teńgeni quraıdy. 2021 jyly aılyq esep kórsetkishiniń (sanaq qyzmetkerleri men issapar shyǵyndaryn esepteýge arnalǵan) artýyna, ári halyq sanynyń ósýine baılanysty, respýblıkalyq bıýdjetti naqtylaý kezinde shyǵyn 5,2 mlrd teńgege artty, onyń ishinde sanaq júrgizý úshin tartylatyn qyzmetkerler men shtattan tys qyzmetkerlerdiń eńbekaqy qory – 4,259 mlrd teńge ( 32 myńnan astam ıntervıýer tartylmaq).

Agenttiktiń 2021 jylǵa josparlaǵan jıyntyq bıýdjeti 18,8 mlrd teńge kóleminde ( 2020 jyly – 12,8 mlrd teńge), onyń ishinde, Agenttiktiń ortalyq apparatynyń bıýdjeti– 325 mln teńge ( 2020 jyly – 59,7 mln teńge), Agenttiktiń Ulttyq statıstıka Bıýrosynyń bıýdjeti – 18,7 mlrd teńge ( 2020 jyly– 12,7 mlrd teńge).

Agenttiktiń 2021 jylǵy bıýdjetiniń arttyrylýy qarastyrylmaǵan. Kerisinshe, sanaq ótkizilgennen keıin Agenttiktiń shtattyq sanyn birmezettik 25% qysqartý josparlanǵan, ári jyl saıyn 2024 jylǵa deıin bıýdjettik shyǵyndardy 10-18% kóleminde júıeli túrde qysqartý kózdelip otyr.