Strategııalyq zertteýler ınstıtýty Ortalyq Azııadaǵy 2016 jylǵy eń mańyzdy 10 oqıǵany tanystyrdy
«Tájirıbe júzinde kóptegen ekonomıkalyq qurylymdarda qańtardyń birinshi jartysynda ózderiniń aınalysyp otyrǵan baǵyttary boıynsha tıisti boljamdaryn nemese sholýyn jarııalaıtyn dástúri bar. Dástúrdi ustana otyryp, biz de ózimizdiń sholýdy usynýdy jón kórdik»,-dedi QR Prezıdenti janyndaǵy Strategııalyq zertteýler ınstıtýtynyń dırektory Erlan Qarın «Ortalyq Azııa 2016: trendter jáne syn-qaterler» atty dóńgelek ústelde.
Onyń sózine qaraǵanda, osyndaı sholýlardyń basty maǵynasy men maqsaty sarapshylyq qaýymdastyq nazaryn bıylǵy basty taqyryptarǵa aýdartýǵa negizdelgen.
Sarapshylardyń aıtýynsha, 2016 jyldaǵy basty oqıǵalardyń qataryna álemdik naryqtar konıýnktýrasynyń nasharlaýy jáne Ortalyq Azııa elderinde ekonomıkalyq ósim qarqynynyń baıaýlaýy enip otyr.
Ekinshisi - eýrazııalyq keńistikte ekonomıkalyq ózara is-qımyldyń jańa joldaryn izdestirý, úshinshisi - Ortalyq Azııada Qytaıdyń ınvestıtsııalyq qatysýyn keńeıtý, tórtinshisi - óńirlik qaýipsizdik kúntártibinde aýǵan faktoryn ózektendirý, besinshisi - sırııalyq qaqtyǵys turǵysynda lańkestik qaterdiń artýy, altynshy - óńirlik qaýipsizdik salasynda Ortalyq Azııa elderiniń kúsh-jigerin jandandyrý, jetinshisi - Ortalyq Azııa elderiniń kezekti elektoraldyq naýqanǵa aıaq basýy, segizinshisi - óńirlik kóliktik jáne energetıkalyq jobalardyń damýyndaǵy jańa kezeń, toǵyzynshysy - Irannyń óńirlik úderisterge qaıta oralýy, sondaı-aq onynshysy - 2017 jyly BUU Qaýipsizdik keńesiniń turaqty emes músheligine Qazaqstandy saılaý máselesi boıynsha daýys berý qamtylyp otyr.
