«Strategııalyq nysandardyń qaýipsizdigi basty nazarda» - respýblıkalyq basylymdarǵa sholý
ASTANA. Qazannyń 9-y. QazAqparat - Qazaq aqparat agenttigi respýblıkalyq basylymdarda qazannyń 9-y, senbi kúni shyqqan ózekti materıaldarǵa sholýdy usynady.
***
Keshe Aqordada Qazaqstan Respýblıkasynyń Prezıdenti Nursultan Nazarbaevtyń tóraǵalyǵymen Qaýipsizdik Keńesiniń májilisi ótip, onda elimizdegi strategııalyq nysandardyń qaýipsizdigi men ómirlik qamtamasyz etý nysandarynyń jaǵdaıy máseleleri qaraldy. Osy jaıtty qaýzaǵan maqala «Egemen Qazaqstan» gazetiniń senbilik sanynda «Strategııalyq nysandardyń qaýipsizdigi basty nazarda» degen taqyryppen jarııalandy. «Qazaqstan Respýblıkasynyń Prezıdenti N.Á.Nazarbaev, talqylaýdy qoryta kele, memleket qorlarǵa, holdıngter men damý ınstıtýttaryna óte úlken qarjy bólgenin, sondyqtan osy uıymdardyń qyzmetiniń tıimdiligine monıtorıng júrgizýdi jáne baqylaý jasaýdy qamtamasyz etý qajettigin erekshe atap kórsetti. Atalǵan máseleni talqylaýdyń qorytyndysy boıynsha Memleket basshysy Úkimetke, sot, quqyq qorǵaý jáne ózge múddeli memlekettik organdarǵa aldyǵa qoıylǵan mindetterdi iske asyrý jónindegi qajetti sharalardy júzege asyrýdy tapsyrdy», dep jazady basylym.
«Egemen Qazaqstan» gazetiniń jazýynsha, Elbasy Nursultan Nazarbaev Túrik Respýblıkasy Uly Halyqtyq Jınalysynyń (Parlamenti) Tóraǵasy Mehmet Alı Shahındi qabyldady. Áńgimelesý barysynda ekonomıka, saýda, saıası ózara is-qımyl, sondaı-aq parlamentaralyq baılanystardy nyǵaıtý salalaryndaǵy ekijaqty yntymaqtastyqtyń keń aýqymdy máseleleri talqylandy. Joǵary deńgeıli kezdesý jaıynda basylymnyń búgingi nómirindegi «Elbasynyń róli ataldy» degen maqaladan bile alasyzdar.
***
Bizdiń qoǵamda «teńin tapsa, tegin ber» dep, keıde jas jubaılardyń jarastyǵy úshin qyz balany jat jurtqa qalyń malsyz berý dástúri qalyptasqany belgili. Qyz balanyń qunyn úıir-úıir jylqymen para-par sanap, ejelgi saltty ustaný da bar. Degenmen qalyń mal berý saltynyń ár aımaqta áralýan ekeni, ony ustanýǵa kelgende jurttyń jikke bólinip jatatyny taǵy bar. Zaman aǵymy men adamdardyń kózqarasy salttyń óziniń burmalanýyna, ony árkimniń árqalaı qabyldaýyna ákelip soqty. Azamattarymyzdyń ómirinde eleýli oryn alatyn, ár otbasynyń negizin qalaýǵa septigi tıetin salttyń elimizdiń barlyq aımaǵy, barlyq turǵyny úshin birizdi bolýy qajet pe? Bul saýaldyń jaýabyna qanyqqyńyz kelse, «Alash aınasy» gazetiniń turaqty «Oı-kókpar» aıdaryndaǵy mamandar pikirine nazar salyńyz.
«Qyzyljardan sábı kúlkisi sırek estiledi». Osy taqyryppen «Alash aınasy» gazetiniń senbilik nómirinde jaryq kórgen maqalada Qyzyljarda bala týý kórsetkishin kóterý maqsatynda «Urpaqtar qory» atty baǵdarlama júzege asyrylyp jatqandyǵy ári qyrkúıektiń 1-inen bastap oblysta tórtinshi sábıi dúnıege kelgen 26 otbasynyń 109 balasyna depozıt ashylyp, árqaısysynyń esepshotyna 226 myń teńgeden aqsha salynǵandyǵy baıandalady. Basylymnyń jazýynsha, bul jaǵymdy jańalyqty ata-analarmen kezdesken oblys ákimi Serik Bilálov málimdegen.
***
«Esep komıtetiniń tóraǵasy Omarhan Óksikbaev jurt nazaryn aýdarar derekter baryn jarııa etti. Óksikbaevtyń jaýyngerleri kún-tún jorta júrip, biraz jerge revızııalyq saparmen baryp qaıtypty. Basty nysana - revızııalyq komıssııalar bolǵan. Dálirek aıtsaq, Almaty, ShQO, Qostanaı, Mańǵystaý jáne Pavlodar oblystaryndaǵy máslıhattardyń revızııalyq komıssııalarynyń Elbasy bekitken memlekettik qarjylyq baqylaý standarttaryn qanshalyqty saqtap otyrǵandyǵy tekserilgen. Nátıjesinde, kóptegen tosyn jaıttar anyqtalypty. Bas shaıqatar derekter Óksikbaev vedomstvosynyń, jergilikti bıýdjetterdiń atqarylýyn syrtqy baqylaý júıesiniń tıimdiligi máselelerine arnalǵan keńeıtilgen jıynynda jarııa etildi», dep jazady «Aıqyn» gazeti. Maqalanyń baıybyna barǵyńyz kelse, basylymnyń senbilik sanyndaǵy «Revkomıssııadaǵy retsizdikter. Esep komıeti eldi eleń etkizer málimet jarııalady» degen taqyrypqa nazar salyńyz.
Osy basylymnyń dástúrli «Aq sóıle!» aıdarynyń búgingi qonaǵy «Qazaq ádebıeti» gazetiniń bas redaktory, jazýshy Jumabaı Shashtaıulymen arada órbigen. Basylym tilshisiniń barlyq saýldaryna tuşymdy jaýap bergen ol: «Eń ótkir másele - bizdiń ekijúzdiligimiz. Balanyń - ákeniń, ákeniń -balanyń aldyndaǵy, qyzdyń - shesheniń, shesheniń - qyzdyń aldyndaǵy ekijúzdiligi. Shańyraqty basqaryp otyrǵan adamnyń óziniń shyndyǵy joq. Ýaqytsha ómirdiń lázzatyna, ýaqytsha tabysqa aldanatyn ultqa aınalyp baramyz», depti. Ekeýara áńgimeniń tolyq nusqasyn «Úzeńgi joldas» arqyly halyqqa qatty tanyldym» degen taqyryptan oqı alasyzdar.
***
«Adam quqyqtary jónindegi ýákil Asqar Shákirov Varshava qalasynda ótken gýmanıtarlyq ólshem salasyndaǵy EQYU Sholý konferentsııasyna qatysty jáne «Ulttyq quqyq qorǵaý ınstıtýttary men adam quqyqtaryn qorǵaýda azamattyq qoǵamnyń roli» atty baıandamasymen sóz sóıledi», dep jazady «Kazahstanskaıa pravda» gazeti. Basylymnyń atap ótýinshe, qazaqstandyq ombýdsmen óziniń sóz sóıleýinde quqyq qorǵaý qyzmetinde memlekettik organdar men úkimettik emes uıymdardyń tyǵyz jáne tıimdi ózara árekettesý qajettiligin qamtıtyn osy máseledegi óz pikirimen bólisken. Sondaı-aq konferentsııanyń qatysýshylary Qazaqstanda osy úrdistiń jáne ulttyq qorǵaý ınstıtýtynyń medıatory retinde ondaǵy róliniń damýy barysymen tanysqan.
