Strategııalyq mindetter Parlamentke memlekettik baǵdarlamalardy baqylaýdy kúsheıtýdi talap etedi - Pishembaev
ASTANA. QazAqparat - QR Parlamenti Májilisiniń depýtattary - Nurlan Ábdirov pen Meıram Pishembaev Qaraǵandy qalasyndaǵy quıý-mashına jasaý zaýytynyń jumysshylarymen kezdesti.
Májilismender Elbasynyń Qazaqstan halqyna joldaǵan «Qazaqstannyń úshinshi jańǵyrýy: jahandyq básekege qabilettilik» atty Joldaýyn jáne memlekettik bılik tarmaqtarynyń arasynda ókilettilikterdi qaıta bólý jónindegi Úndeýin jumysshylarǵa taratyp aıtyp berdi, dep habarlaıdy tómengi palatanyń baspasóz qyzmeti.
«Memleket basshysynyń halyqqa Joldaýlary memleketimizdi, qundylyqtarymyzdy, basymdyqtarymyz ben ortaq maqsattarymyzdy aıqyndaıdy. Elimizdiń basty maqsaty - Qazaqstannyń eń damyǵan 30 memleketiniń qataryna kirý. Osy maqsatqa jetý úshin bizde adamı áleýeti de, óńirlerdi, salalardy damytýdyń naqty baǵdarlamalary da bar. Bıylǵy Joldaýda Qazaqstan ekonomıkasyn ozyq tehnologııalarmen jetildirýge, jańartýge, ınnovatsııalyq salada kúshti serpin berýge basty nazar aýdarylǵan», - dedi Nurlan Ábdirov.
Depýtattar ındýstrıalandyrý, ınfraqurylymdy damytý, bıznesti, agrokásiptik keshendi, bilim, densaýlyq saqtaý salalaryn qoldaý sharalary týraly aıtty.
Qazaqstannyń óz damýynyń jetistikteri týraly aıtqanda, depýtattar elimizdiń basty jetistikteri, memlekettik maqsattardy oryndaýdaǵy memlekettik basqarý júıesiniń roli týraly atap ótti. «Táýelsizdikke qol jetkizgen 25 jyl ishinde Prezıdenttik myqty bıliktiń arqasynda atqarýshy jáne ókiletti tarmaqtardyń naqty jumysy qalyptastyryldy, ekonomıkanyń ósýi qamtamasyz etildi. Al qazir, jańa zaman, jańa strategııalyq mindetter men memlekettiń jańa damý kezeńi. Osynyń barlyǵy qoǵamdy odan ári demokratııalandyrýdy, ıaǵnı Parlament tarapynan memlekettik baǵdarlamalardyń oryndalýyna baqylaýdy kúsheıtýdi, atqarý organdarynyń jaýapkershiligin joǵarlatýdy talap etedi», - dedi Meıram Pishembaev.
Kásiporyn jumysshylary da Prezıdenttiń Joldaýy men memlekettik bılik tarmaqtarynyń arasynda ókilettilikterdi qaıta bólý jónindegi Úndeýinde qoıylǵan mindetter men reformalar týraly óz oılaryn jetkizdi: «Parlamenttiń baqylaý fýnktsııalaryn kúsheıtý - bul óte kerek nárse dep oılaımyn. Memleket barlyq salalardy damytý úshin kóp qarajat bólip jatyr. Osy qarajattyń qalaı jáne qanshalyqty tıimdi paıdalanylyp jatqanyn depýtattar bilýi qajet. Olar Prezıdent tapsyrmalarynyń oryndalý sapasyna yqpal etýleri qajet», - dedi kásiporynnyń besinshi sanatty frezerovşıgi - Denıs Popov.
