Strategııalyq josparlaý jáne reformalar agenttiginiń tóraǵasyna jańa mindet júkteldi
ASTANA. KAZINFORM — Premer-mınıstr Oljas Bektenovtiń tóraǵalyǵymen QR Úkimetiniń Halyqaralyq qarjy uıymdarymen yntymaqtastyǵy jónindegi úılestirý keńesiniń otyrysy ótti. Bul týraly Úkimettiń baspasóz qyzmeti habarlady.
Otyrys barysynda ekonomıkalyq reformalar men ınvestıtsııalyq jobalardy júzege asyrý sheńberinde halyqaralyq qarjy uıymdarymen ózara is-qımyldyń tıimdiligin arttyrýǵa baǵyttalǵan kóptegen másele talqylandy. Úılestirý keńesiniń aldyńǵy otyrysynyń hattamalyq tapsyrmalaryn oryndaý qorytyndylary jáne jobalardy júzege asyrý rásimderin odan ári ońtaılandyrý jáne jedeldetý jónindegi usynystar, sondaı-aq birlesken baǵdarlamalardy keńeıtý perspektıvalary qaraldy.
— Premer-mınıstr Memleket basshysynyń tapsyrmasy boıynsha QR Strategııalyq josparlaý jáne reformalar agenttiginiń tóraǵasy Áset Erǵalıev halyqaralyq qarjy uıymdarymen yntymaqtastyq jónindegi ulttyq baılanys jasaıtyn tulǵa bolyp belgilengenin habarlady. Atalǵan tásil jobany júzege asyrýdaǵy tártipti jáne birlesken baǵdarlamalar men analıtıkalyq zertteýlerdiń maquldaý jedeldigin arttyrýǵa múmkindik beretini atap ótildi, — delingen habarlamada.
Dúnıejúzilik banktiń Qazaqstandaǵy ókili Andreı Mıhnev prıorıtetti baǵdarlamalardy josparlaý jáne tıimdi júzege asyrý maqsatynda qarjylandyrý kózderin kórsete otyryp, memlekettik qaryzdar men memlekettik kepildikterdi qamtıtyn kópjyldyq ınvestıtsııalyq jospar bekitýdi usyndy.
Energetıkalyq qýat kózderiniń birinen ekinshisine kóshý salasyndaǵy bastamalar óz aldyna bólek talqylandy. Otyrysqa qatysýshylar energetıkalyq transformatsııa boıynsha prıorıtetti jobalardy biriktirý jáne uzaq merzimdi halyqaralyq qarjylandyrýdy tartýǵa baǵyttalǵan eldik ınvestıtsııalyq platformany qalyptastyrý jónindegi usynystardy qarady. Energııamen qamtý senimdiligin arttyrý, tehnologııalyq jańartý jáne ınvestıtsııalar tartý quraly retinde energetıkalyq kóshýdiń mańyzdylyǵy atap ótildi.
QR Energetıka, Ekologııa jáne tabıǵı resýrstar mınıstrligi 2025 jyl boıy EQDB-men birlesip energetıka sektoryna nazar aýdara otyryp, Qazaqstannyń ádil energetıkalyq kóshýi jónindegi Eldik ınvestıtsııalyq platformasynyń (KazJETP) tujyrymdamasyn daıyndady.
Eldiń energetıkalyq sektorynyń platformasy aýqymdy halyqaralyq qarjylandyrýdy tartý jáne Qazaqstannyń klımattyq maqsattaryna qol jetkizý úshin tıimdi ıntegratsııalanǵan júıelik tásil retinde qarastyrylady. Atalǵan tetik halyqaralyq qarjy ınstıtýttarynyń, memlekettik organdardyń jáne jeke sektordyń resýrstaryn biriktire otyryp, klımattyq qarjylandyrýdy úılestirýdi qamtamasyz etýge arnalǵan.
Sondaı-aq halyqaralyq qarjy uıymdarynyń qatysýymen júzege asyrylatyn birqatar ınfraqurylymdyq jobany, onyń ishinde sý sharýashylyǵy, sý tasqyny táýekelderin basqarý jáne kommýnaldyq ınfraqurylym salasyndaǵy jobalardy júzege asyrý máseleleri qaraldy. Atap aıtqanda, Aqmola oblysyndaǵy Esil ózeninde Esil qarsy rettegishin salý jáne Aqmola oblysy Stepnogorsk qalasynyń kárizdik tazartý qurylysjaılaryn rekonstrýktsııalaý jónindegi jobalarǵa Azııa damý bankiniń qatysýy.
— Premer-mınıstr ekonomıkany turaqty damytý jáne basym salalarǵa ınvestıtsııalar tartý úshin halyqaralyq qarjy ınstıtýttarymen áriptestiktiń mańyzdylyǵyn atap ótti. Úkimet uzaqmerzimdi turaqty áserlerge qol jetkizýge baǵyttalǵan bastamalardy qoldaýdy jáne týyndaǵan máselelerge jedel den qoıýdy jalǵastyrady. Otyrys qorytyndysy boıynsha memlekettik organdarǵa halyqaralyq áriptestermen birlesip usynylǵan usynystardy pysyqtaýdy, is-qımyldardy úılestirýdi jáne birlesken ınvestıtsııalyq jobalardy ýaqtyly júzege asyrýdy qamtamasyz etý tapsyryldy, — delingen vedomstvo habarlamasynda.
Budan buryn Oljas Bektenov Prezıdenttiń «Alataý» ITP» AEA aýmaǵyndaǵy joǵary tehnologııalyq óndiristerdi damytý jónindegi tapsyrmalarynyń oryndalý barysyn teksergenin jazǵan edik.