Strategııalyq nysandar tizimine qandaı obektiler kiredi

ASTANA. KAZINFORM — Qazaqstanda strategııalyq nysandardy aıqyndaý tetikteri naqtylanyp, olardy jekeshelendirý men basqarý tártibi qaıta qaralady. Bul memlekettik múlikti basqarý júıesin jetildirýge baǵyttalǵan zań jobasynda kózdelgen. 

Habarlamada aıtylǵandaı, qujatta birqatar mańyzdy ózgerister men tolyqtyrýlar qarastyrylǵan.

Birinshiden, strategııalyq obektilerdi anyqtaý ólshemsharttary naqtylanady. Strategııalyq nysandar tizimine ulttyq qaýipsizdikke, ekonomıkanyń turaqtylyǵyna nemese memlekettiń aýmaqtyq tutastyǵyna qaýip tóndirýi múmkin ınfraqurylymdyq obektiler engiziledi.

Ekinshiden, jekeshelendirý protsesi ınvestıtsııa tartý jáne jumys oryndaryn saqtaý sharttarymen júzege asyrylady. Bul rette strategııalyq obektilerdiń tizbesi Úkimettiń nemese jergilikti atqarýshy organdardyń sheshimimen bekitiledi.

Úshinshiden, áleýmettik-kásipkerlik korporatsııalardyń óńirlik ekonomıkany damytýdaǵy róli aıqyndalady. Olar ınvestıtsııalyq jobalardy iske asyrýǵa qatysyp, qyzmetin ashyqtyq, ádil básekelestik jáne memleket pen bıznes arasyndaǵy teń quqyly áriptestik qaǵıdattary negizinde júzege asyrady.

Sonymen qatar memlekettik múlikti basqarý tıimdiligin arttyrý maqsatynda avtomattandyrylǵan taldaý tetikteri engiziledi. Memlekettik múlik tizilimine qosymsha málimetter engizý arqyly aqparattyń tolyqtyǵy men durystyǵy qamtamasyz etilmek.

— Zań kúshine engen jaǵdaıda jergilikti atqarýshy organdar áleýmettik-kásipkerlik korporatsııalardyń aktıvterine túgendeý júrgizip, beıindi emes aktıvterden shyǵý jáne damý josparlaryn qaıta qaraý jumystaryn júzege asyrýǵa mindetti bolady, — delingen qujatta.

Buǵan deıin QR Ulttyq ekonomıka mınıstrligi «Ashyq NQA» portalynda jarııa talqylaý úshin ornalastyrylǵan «QR keıbir zańnamalyq aktilerine Memlekettik múlik máseleleri boıynsha ózgerister men tolyqtyrýlar engizý týraly» zań jobasyn usyndy.