Strategııalyq mańyzdy jobalar Ulttyq qordan qarjylandyrylady – Prezıdent
ASTANA. KAZINFORM – Birinshi shaqyrylymdaǵy Quryltaıdyń birinshi sessııasyn ashqan Qasym-Jomart Toqaev Ulttyq qor qarajatyn urpaqqa qajetti zamanaýı, sapaly ınfraqurylymdy damytýǵa jumsaý jóninde aıtty.
– Áleýmettik-ekonomıkalyq turǵydan uzaqmerzimdi paıdasy bar strategııalyq mańyzdy jobalardy qarjylandyrý, sonyń ishinde Ulttyq qordan qarjy bólý josparlanyp otyr. Qarajat ońdy-soldy, maqsatsyz jumsalmaıdy. Mundaı qaýesetti esh nárseden habarsyz, nıeti teris adamdar taratady, – dedi ol.
Sonymen birge, Prezıdenttiń sózinshe, kez kelgen qordyń, ásirese, Ulttyq qordyń tıimdiligi, eń aldymen, keler urpaqtyń ıgiligi jolyndaǵy zor tabysqa, naqty nátıjege qol jetkizýmen ólshenedi.
– Ulttyq qordyń paıdasyn balalarymyz kórip otyr. Olardyń esepshotyna qomaqty qarajat aýdarylyp jatyr. Keleshekte óskeleń urpaqqa qyzmet etetin zamanaýı, sapaly ınfraqurylymdy damytýymyz kerek. Basqasha aıtqanda, elimizdiń aldaǵy ondaǵan jyldar, tipti ǵasyrlar boıy damýyna berik negiz qalanady. Memleketimizdiń irgesi de osy ıgi isterdiń arqasynda bekı túsedi. Bul máselege Qazaqstan halqyna arnaǵan Joldaýymda keńirek toqtalamyn, – dedi Memleket basshysy.
Aıta keteıik, buǵan deıin partııalardyń bılik júıesindegi yqpaly da kúsheıe túsetini jónindegi Prezıdent málimdemesin jarııalaǵanbyz.
