Strasbýrgte sot júıesindegi reformalar tanystyryldy
ASTANA. KAZINFORM – Qazaqstan Respýblıkasy Joǵarǵy Sotynyń Tóraǵasy Aslambek Merǵalıev Eýropa saraıynda Sot tóreliginiń tıimdiligi jónindegi Eýropalyq komıssııanyń (CEPEJ) 43-shi jalpy otyrysynda sóz sóıledi.
47 memlekettiń ókilderi qatysqan bedeldi halyqaralyq uıymnyń jalpy otyrysynda alǵash ret qazaq tilinde baıandama tyńdaldy. Qazaqstan Joǵarǵy Sotynyń Tóraǵasy elimizdiń sot reformalary salasyndaǵy negizgi jetistikterine toqtalyp, elimizdiń qoljetimdi, tıimdi jáne táýelsiz sot júıesin qurý arqyly alǵa qaraı eleýli qadamdar jasaǵanyn aıtty.
Reformanyń negizgi baǵyttarynyń qatarynda ol sottardyń táýelsizdigin qamtamasyz etýdi, protsesterdi tsıfrlandyrýdy jáne isterdi qaraý ýaqytyn qysqartýdy erekshe atap ótti. Osylaısha, Qazaqstanda azamattyq ister orta eseppen 48 kúnde qaralady, bul eýropalyq 237 kúndik kórsetkishten edáýir az.
Jasandy ıntellekt pen tsıfrlyq tehnologııalardy engizýge erekshe nazar aýdaryldy.
Búginde talap qoıýlardyń 95 paıyzy elektrondy túrde berilip, sot isin onlaın rejımde qaraýǵa bolady. Bul sharalar sot tóreliginiń ashyqtyǵy men qoljetimdiligin arttyrdy.
Jalpy otyrys aıasynda A.Merǵalıev CEPEJ Prezıdenti Franchesko Depaskýalemen kezdesti. Halyqaralyq uıymnyń basshysy jaqynda ótken Qazaqstan Respýblıkasy sýdıalarynyń IX sezin joǵary baǵalap, Qazaqstandaǵy sot reformalarynyń progressıvtiligin erekshe atap ótti.
F.Depaskýale Eýropa Keńesi elderinde Qazaqstannyń tájirıbesin, atap aıtqanda, birkelki sot praktıkasyn qalyptastyrýǵa baǵyttalǵan jasandy ıntellektti zerdeleý men engizýge degen úlken qyzyǵýshylyq týraly aıtty.
Sondaı-aq sapar aıasynda qazaqstandyq delegatsııa Adam quqyqtary jónindegi Eýropalyq sotynyń (AQES) Prezıdenti Marko Boshnıakpen resmı kezdesý ótkizdi. Basqosý barysynda Qazaqstannyń Joǵarǵy Soty men AQES arasyndaǵy yntymaqtastyqty nyǵaıtý máseleleri, onyń ishinde tájirıbe almasý jáne Qazaqstan sýdıalary úshin oqytý is-sharalaryn ótkizý múmkindikteri talqylandy.
A.Merǵalıev adam quqyqtaryn qorǵaý standarttaryn ilgeriletýde AQES-niń qoldaýyna rızashylyǵyn bildirdi jáne yntymaqtastyq týraly memorandýmǵa qol qoıýdy usyndy.
Aıta keteıik, mundaı is-sharalar Qazaqstannyń halyqaralyq yntymaqtastyqty damytýǵa jáne sot salasyndaǵy ozyq standarttardy engizýge beıildiligin kórsetedi.